Silly Point : Deccan Weekend
Vawiin lamah tun hma Andhra Pradesh khawpui pawimawh pahnihah inkhel inang lo mah se pawimawh tak si a awm dawn. India team-in first Test-a Hyderabad-a an mualpho hnuin, Vishakapatnam khawpuia England hneh ngei tumin ṭan an khawh dawn.
Inhliam vanga inlan thei lo KL Rahul leh Ravindra Jadeja bakah, chawlh lailawk lai Virat Kohli a te tel lohna team hian pitch nen, an kutah awm thei zawng zawng hmangin advantage neih an tum dawn a ni.
Hyderabad
Tun Pathianni lawka India leh England inkhelh zawhna Rajiv Gandhi International Stadium lamah kan Mizo tlangvalten mual neitu, table topper leh rinkai zawk Hyderabad chu ni li chhung awh Ranji Trophy-ah an tum dawn.
Plate group semifinal lut chiang tawh an nih avangin, match practice ṭha tak a ni dawn. Mizoram tana tun season-a lawmawm deuh chu kan outstation professional lak pathumte an pawimawh rual rualin, kan ṭhangthar leh age group aṭanga mumal taka rawn chawrchhuak Joseph te, Jehu te, Hruaizela te leh Remruatdika te ho a khat tawka hming lang thama an khel ṭhin hi a ni.
Tun aia sakhat leh nghet zawkin an la khel chho zel turah pawh ngai ila, kum an la ngah a, an inkhelh apiang hi tawnhriat leh inzirna hun ṭha tih an theihnghilh loh chhung chuan van boruak sang khi an tan chuan tlang chhip ni mawlh teh se.
Senior players mahni phak tawka lo kaihruai tur dressing room lamah an lo la awm nual nen. Mizoram Cricket hian bung thar a kai ngei turah ngai ang. Semifinal an khelh dawnah chipchiar zawkin team chhung leh pawn, an ti ti leh player ṭhenkhat X-ray na kan nei thei turah ngai ang.
Vishakapatnam
Hyderabad atana chhak lam 600 km vela hla, tuipui kamah hian tun hma Andhra Pradesh ni ho vek ṭhin, Hyderabad dawta khawpui lian ber Vishakapatnam-ah India leh England ten second Test an khel dawn bawk.
Nimin leh nimin piah lam team practice session en chuan, India batting coach Vikram Rathore-a'n a batsman-te ho sweep practice a neih reipui hle a, heta ṭang ringawt pawh hian, ni khat ni aṭanga ball sawt kawi zek zek mai tur pitch kan lo beisei a nih pawhin kan beisei sual lutuk lo mai thei.
Hyderabad inkhel ang khan ni nga inkhel turah ni thumna emaw, ni linaah pawh thleng zo loin result kan hmu leh thei bawk. A lehpek lamah inkhel thlirletna leh Ranji Trophy boruak kan ziak leh zel turah ngai ang.