AFCON Quarterfinal : Nigeria hmaah Angola an ding dawn

Africa Cup of Nations 2023 chuan a vawr tawp a thleng chho mek - zanin dar 10:30 hian quarterfinal hmasa berah Nigeria leh Angola te an inhmachhawn dawn a, zanlai dar 1:30-ah DR Congo leh Guinea te an intawng bawk ang.

Super Eagles (Nigeria sawina) hian last 16-ah team ṭha Cameroon an hneh a, an khingpui tur Angola hian Namibia hnehin quarterfinal an lut thung - Afcon bikah knockout stage china an chakna hmasa ber a ni hial.

Jose Peseiro-a enkawl Nigeria hian tun hmain Afcon nomawi hi vawi thum an chawi tawh, kuminah hian a vawi li nan champion an beisei sang hle. Striker Victor Osimhen-a'n beisei angin goal a la khung tam tawk lo, an match hnuhnung bera goal hnih khungtu Ademola Lookman a pawimawh leh ang.

Napoli tana Serie A champion ni thei Victor Osimhen hian an ram tan nomawi hlawhchhuah ngei a tum a, goal khung tam rih lo mah se coach Peseiro-a'n a sawi angin inkhelah a ṭangkai ṭhin - Angola tana ven ngun ngai bik chu a ni dawn tho.

Nigeria hian Cameroon an hneh ṭuma inhliam goalkeeper Stanley Nwabali an chhawr thei dawn, hetih lai hian an defender pawimawh leh vice captain ni bawk William Troost-Ekong tel loin tun kar tir lamah kha chuan an training, a malpui hliam vangin a dinhmun a chiang rih lo a ni.

Inkhel danga inlan tur Congo DR zinkawng hi a mak danglam, hun pangngai chhunga chak nei miah loin quarterfinal an lut. Group match vawi thum an khelhah vawi khat tlawmin ṭum hnih an khingpuite nen an inhnehtawk.

Last 16-ah team ṭha Egypt chu hun pangngaiah 1-1 in an inhnehtawkpui a, extra time zawh hunah pawh goal dang a lut lo. Penalty shootout-ah vawi sarih champion tawh hi 8-7 in an hneh a, zinkawng mak danglam tak an zawh.

DR Congo tumpui tur Guinea pawh hian chhuan tur vak an nei lo. Tun hmain Afcon-ah hian group stage an la pel ngai lo a, tun ṭuma an thlen chin apiang hi an tan chuan dai ngai loh ram a ni zel - mumang aṭanga harhchhuak loa kai san zel an tum ang.