Arsenal tana fiahna tur Liverpool
Premier League champion ni tur chuan mahni elpui, team lian leh ṭha hneh thei nih a ngai - Arsenal chuan team puitling sa Liverpool lakah fiahna hautak an hmachhawn dawn, champion turin an ṭha tawk em, tih fiahna a ni ang - paltlang thei tak ang maw!
Pathianni zan dar 10:00 hian Emirates Stadium-ah Reds an lut dawn, manager Jurgen Klopp tan hun hnuhnung a ni chho zel tawh. German pachal hian sulhnu ṭha tak nen North London hi kalsan a duh ngei ang, inkhel hmuhnawm beisei ngam a ni.
Arsenal hian hmahruaitu Liverpool hi khelh zat inangah point ngain an phak lo, an mikhual an hneh theih a nih chuan an inkar a zim dawn - an chak lo a nih erawh chuan EPL nomawi beiseina a thamral tluk a ni ang.
Nunez a chiang lo
Hliam vangin Mohamed Salah a inkhel thei lo chiang a, tlarhma lama rinrawl pakhat Darwin Nunez chu Chelsea laka a hliam vangin Arsenal lakah a inkhel thei ngei dawn em, tih a la chiang lo. Luis Diaz, Diogo Jota leh Cody Gakpo te chungah mawhphurna a sang zual ang.
Liverpool manager Klopp chuan, "Darwin a inkhel thei dawn em tih ka chiang lo, a ke na ti tak chungin khelmual a chhuahsan tih chu ka hria," a ti. Uruguay international hian Chelsea lakah hun ṭha hlah hnem mah se, goal nawr kawngah a hlauhawm tih a sawi.
Reds hian hliam vangin harsatna an tawk a, mahse coach Klopp chuan, "Hetiang buaina hi kan tan chona a ni lem lo, a chhan chu tun season chhunga kan tawn vawi khatna a ni lo. Player khel thei lo an awm laiin midang tan remchang a ni mai a, hliam dam an awm ve zel bawk," tiin a lungngai lo.
An chak chuan Liverpool hian point riatin hma an hruai fal dawn, champion lai Manchester City chu Thawhṭanni zanah an inkhel dawn chauh a ni. Klopp chuan, "Kan chak chuan point riatin kan fal dawn, hei erawh sawi chi a ni rih lo. Inkhelh tur chauh ngaihtuah a hun.
"Tunah hian kan boruak a ṭhain kan khel ṭha ṭhin a, Arsenal lakah chuan a harsa dawn. Chuvangin inkhel thunun kan tum tur a ni ang a, kan hun remchang neih kan bawhpelh tur a ni lo bawk ang," tiin a ṭawng fimkhur hle.
Jesus awmna
Goal khung vanga an buaina chu Arsenal buaina a la ni reng a, chutihrualin Gabriel Jesus chet dan avang erawh chuan an hlauhthawnna tam tak chu a kiang ngeiin a rinawm - Brazil international hian Liverpool lakah goal khung leh ngei a tum ang.
Ibrahima Konate leh Virgil van Dijk te hmachhawn tur Jesus chuan, "Ka ṭhiante thlawpna ka dawng ṭha thei em em a, chu mai bakah engtiangin nge goal ka khung theih ang tih ka ngaihtuah nasa, a tirah ti fuh vek lo mah ila a fuh chin chu a awm," tiin beiseina a neih thu a sawi.
League match bika Liverpool an mikhual hnuhnung berah Bukayo Saka-a'n goal hnih a khung a, England international hi ven ngun ngai a ni leh ang, ani bakah hian player tlan chak Gabriel Martinelli a awm leh bawk a rinawm - counter attack an hmang leh ngei ang.
Mual sir hi Arsenal hlauhawmna a ni ṭhin, chutihrualin an khingpui lamin an beih nat ṭhinna lai a ni bawk. Reds hian Chelsea an sawp ṭumin Andy Robertson leh Trent Alexander-Arnold te bench aṭangin an lut thei tawh; Gunners lakah chuan bul an ṭan a rinawm - an hmanraw hlauhawm an ni leh dawn.
Arsenal tana pawimawh chu mual lai a ni dawn. Martin Odegaard-a'n zalen taka goal a nawr theih a, a hnungah Declan Rice a dingnghet a nih bawk chuan Reds hneh turin kawng a inhawng - tlarhnung sir lamah Oleksandr Zinchenko a chetsual loh a pawimawh bawk ang.