Thlasik transfer a reh - sum sen a tlem

Football transfer hawn a nih apianga thawm na ber ni ṭhin Premier League meuh pawh kum 2024 thlasik transfer-ah an reh ṭhuap a, player thar lakluh kawngah an insum vek a ni ber - English top flight league club-te sum sen belhkhawm hi pound maktaduai 100 a ni!

Covid-19 in a tihbuai kum chhiar tel lohin, 2011-12 season hnua thlasik transfer-a Premier League club-ten sum an sen tlem ber ṭum a ni a, kha January transfer-ah khan pound maktaduai 60 chiah Premier League club-ten an seng.

Season hmasa thlasik transfer-ah khan Premier League club-ten player thar lakluh nan pound maktaduai 815 zet an seng a, kumin January-a player lei nana sum sen hi nikum aiin £715mtd-in a hniam zawk tihna a ni.

Nimin zing lam dar 4:30-ah khan Premier League thlasik transfer hi khar a ni a, transfer tawp nia PL club-te sum sen belhkhawm chu £30mtd chiah niin, thla 12 liam taa £275mtd zet sen nen chuan a inthlau vet vet hle.

An insum alawm!

Thlasik transfer dang ang lo takin PL club-te an insum a, enge a chhan ni ang, tiin fans tam tak tan inzawh theih a ni. Thil lang chiang tak pakhat chu Premier League hnuaia Profit and Sustainability Rules (PSR) khauh zawka kalpui a nih tak vang a ni tih a chiang a, hei hian an sum senah nasa takin nghawng a nei.

PSR avang hian Everton chu hrem an ni tawh a, thubuai tharlam siamsak ni bawkin, Nottingham Forest chu hrem hmabak an ni a, Manchester City chu hrem theih dinhmunah an ding mek bawk - PSR ang chuan club-te hi kum thum chhungin £105mtd aia tam an hloh a thiang lo.

Everton hi 2021-22 an account thlirin, bawhchhiat an nei ngeia ngaih a ni a, November khan point 10 paihsaka hrem an ni a, hrem an nihna hi ngaihtuah nawn turin an thlen mek.

Mahse, hetihlai vek hian 2022-23 season-a an account-ah pawh fel lo a awm avangin thubuai siamsak an ni leh a, Forest pawh 2022-23 account fel lo avangin thubuai siamsak an ni. Heng zawng zawng thlir hian PL club ho an insum deuh niin a lang.

A chhan dang

Ram pawn league ṭhenkhatin beisei anga January transfer an hman loh vang a ni a, a bik takin Saudi Arabia lam an reh - anni hian January-ah to tak takin player lei leh ngat se, hei hian transfer bazar-ah sum leng vel a titam ang a, chu chuan Premier League a nghawng ang.

UEFA-in dan thar a duang bawk a, hei hi tun season aṭanga hman ṭan niin, European football khel club-te chuan an club sum lakluh aṭanga 90% bak an hmang thiang lo a, hei hi 2025 aṭang phei chuan 70% tih a ni dawn.

Ṭum dang ang lo takin manager inthlak pahnih chiah a awm a, manager thar an awm loh chuan ruahmanna thar a awm meuh lo a, hei hian player lakluh a titlem. Chu mai a ni lo a, nipui transfer-ah club-te an chet nat avangin thlasik-ah inthuam chhah an mamawh tawh lo.

PL club-ten ṭum dang zawng aiin academy player an hmang nasa a, bazar kher loa club academy lam hawi hi PL club-ten an intihhmuh chho dawn niin a lang. Tun season-ah Liverpool right back Conor Bradley, Newcastle United midfielder Lewis Miley leh Manchester City winger Oscar Bobb te chu rawlthar hming langsar an ni.

Transfer langsar

Tun thlasik transfer-a langsar zual zingah chuan Kalvin Phillips-a'n Manchester City chhuahsana West Ham loan-a a zawm te, Borussia Dortmund-a loan-a khel tura Manchester United winger Jason Sancho a kir te, Eric Dier-a'n Tottenham Hotspur aṭanga Bayern Munich a pante chu a ni.

Tun thlasik transfer-a Premier League player man to ber chu Radu Dragusin a ni a, Romanian defender hian Italian club Genoa aṭangin Spurs hi £25mtd-in a zawm a, Germany striker Timo Werner chuan RB Leipzig aṭangin Spurs hi loan-in a zawm bawk a, Spurs an inthuam ṭha.

PL club-ten player naupang lam lei an intihhmuh a, kum 19 mi Argentine winger Valentin Barco chuan Brighton & Hove Albion chu Boca Juniors aṭangin £7.9mtd-in a zawm a, Manchester City chuan Argentina Under 17 midfielder Claudio Echeverri chu River Plate aṭangin an la lut ve bawk.

Transfer tawp nia thleng langsar ber chu Crystal Palace-in Blackburn Rovers aṭanga midfielder Adam Wharton an lakluh chu a ni a, £22mtd an inseng. Armando Broja chuan Chelsea aṭangin Fulham chu loan-in a zawm bawk a, hei pawh transfer tawp nia thleng langsar zual a ni deuh mai!

League dang

Premier League-a club langsarte sum hman a tlakhniam viau laiin, European top five league-a league dangte sum sen erawh January 2023 aiin a sang - season hmasa thlasik transfer-ah khan Serie A, La Liga, Ligue 1 leh Bundesliga te sum sen belhkhawm chu £218mtd niin, kuminah hian £388mtd-ah a sang chho.

Tun thlasik transfer-ah Ligue 1 chu European top five league-a sum seng hnem ber an ni a, £162mtd an seng. Premier League-in French top flight league hi dawtin £100mtd an seng a, Serie A (£85mtd), Bundesliga (£70mtd) leh La Liga (£70mtd) ten an dawt ve leh a ni.

Premier League tan kum 2019 hnua January transfer-a khawvel huapa sum seng hnem ber an nih loh vawi khatna a ni a, European top five league zingah chuan kum 2011 nipui transfer hnua transfer bazar-a sum seng tlem ber an nih vawi khatna a ni bawk.

Nipui transfer-a football khawvel nghawrnghing a, star tam tak thlem lut a, £853mtd zet sengtu Saudi Pro League chu thlasik khawvawtah an insum thei riau a, £21.3mtd chiah tun January-ah player lei nan an seng.