ISL-a Mizo physio hmasa ber Thawmmawia

ISL club Hyderabad FC chuan physiotherapist atan Mizo tlangval PH Lalthawmmawia an la lut. Thawmmawia hian January 30, Thawhlehni khan Hyderabad hi a thleng a, hemi tuk hian hna hi a zawm nghal.

Khatla South tlangval Thawmmawia hi kum 2015 khan Guwahati Downtown College aṭangin a inzir chhuak a, BSc Botany a zo tawh bawk. Tualchhung infiamnaah tawnhriat ṭha tak a nei a; football bikah Zo United, Luangmual FC, Chhinga Veng FC leh Tata Trusts Center of Excellence (COE) tan Physio hna a thawk tawh a, state pawnah chuan Assam Football Association tan a thawk tawh bawk.

Basketball-ah Mizo club ṭha Khatla TBL bakah Cricket Association of Mizoram hnuaiah Physio hna a thawk tawh bawk. ISL-ah Mizo player ṭha ṭhahnem tak an awm tawh a, Thawmmawia hi Physio lama sulsutu a ni. Referee leh coaching staff lamah ISL club-a tel pha an la awm lo thung a, hemi kawngah pawh hian Mizote tan hmasawn a ṭul hle.