A hun tea rah Kobbie Mainoo

Kobbie Mainoo hi i la hre lo a nih chuan i la hre chho khawp ang. Kum 18 mi English rawlthar Mainoo hian injury time-ah pawh minute sarihnaah Manchester United chakna goal a khung a, Erik Ten Hag-a hoten Wolverhampton Wanderers chu 4-3 in an hneh.

Man United tan Marcus Rashford, Rasmus Hojlund leh Scott Mc Tominay ten an khung a; Wolves-in Pablo Sarabia penalty hmangin siphurh sut ṭhen mah se hun tawp lamah 3-1 a la ni tho. Mualneitu lamin Max Kilman hmanga siphurh an sut hnuah injury time minute nganaah Pedro Neto hmangin siphurh an sut zo. Man United ṭantuten indawmkun hman mah se a hun teah Kobbie Mainoo a rawn rah.

Ten Hag-a hote hian February 4, Pathianni zan dar 7:30-ah West Ham an mikhual dawn. David Moyes-a hote hi February 1, Ningani zan khan Bournemouth nen 1-1 in an inhnehtawk thung. Mahse, Hammers hian December thla khan Man United hi 2-0 in an hneh tawh tih hriat a ṭha.

Harhtharna chu

Man United player-te an dam chho a, defence laiah pawh Lisandro Martinez leh Raphael Varane te an inkawp leh tawh. Left back-ah Luke Shaw a awm bakah tlarhnung pui turin Casemiro a awm a, tlarhmaah Marcus Rashford a rawn inlan nghal bawk.

Molineux Stadium-ah Man United-in nung takin inkhel bul an ṭan a; Hojlund-a siamsak chu Rashford-a'n minute ngana lekah a khung nghal. Hojlund pawhin minute 22-naah 'striker goal' tia sawi theih tur goal ṭha tak a khung bawk.

Danish striker Hojlund bakah Casemiro goal khung chu offside vangin pawm a ni lo a, offside vanga goal hnih an pawm lo chungin halftime-ah 2-0 a ni tho. Ten Hag-a hote an nung ṭha bawk a, harhtharna tak tak an changah a ngaih theih.

A ngai te bawk

Second half-ah erawh Man United ni loin Wolves zawkin harhtharhna an chang leh tawh zawk a, Ten Hag-a hote erawh a 'ngai te bawk' an ni. Wolves captain Max Kilman a ball tauh chu Martinez-a'n goalline-ah a dang hman hram a, substitute Rayan Ait-Nouri goal khung tur chu keeper Andre Onana-a'n a dang hman hram bawk.

Casimero-a'n ṭul lo zetin box chhungah Neto a titlu a, Wolves penalty hlawhchhuah chu Pablo Sarabia-a'n minute 71-naah a khung. Man United-in minute li hnuah Scott McTominay hmangin hma hruai leh mah se tlarhnung an rem phui thei lo.

Wolves captain Kilman-a'n minute 85-naah siphurh a sut ṭhen a, injury time minute nganaah Neto-a'n siphurh a sut zo. Man United-in 3-1 a hma an hruai hnuah goal hnih an chhuah a, 3-3 a ni.

Mainoo 'hun'

Kum 18 mi Mainoo-a'n box pawnah ball a chang a, mual veilam sir aṭangin a lai lamah a la lut. Wolves tlarhnungin Mainoo hi an veng tawk lo a, ball a pass chhuak mai turah a ngai niin a lang.

Mahse, Mainoo hian tum dang a nei a, petna tur khawp a insiam hnuah goal kilah tak a pet lut. English midfielder hian kum kua a nihin Man United academy a zawm a, kum kaw hnuah chakna goal leh goal ropui bik Premier League-ah khung.

Mainoo chuan, "Duthusam ram a thleng a ni. Mumang ramah ka la chang mek a, ngai kala awh lo. Ka naupan laia ka khelhna club tana Premier League-a khelh ringawt pawh hi ka tan a ropui em em a ni," tiin inkhelh banah a sawi.