Broja-a'n Fulham a zawm

Chelsea striker Armando Broja chuan season tawp thleng loan-a khel turin Fulham a zawm a, Wolverhampton Wanderers leh AC Milan nen pawh sawizawm ni mah se Cottagers lam hawiin a puanthuah a tel ta zawk.

Kum 22 mi Broja hian tun season-ah Chelsea tan inelna hrang hrangah match 19 khelin goal hnih a khung a, Fulham-ah hriam zawka inchher turin a chhuak - beiseina sang tak nen Stamford Bridge lamin an thlir ang.

Albania international chuan, "Fulham ka zawm thei hi ka lawm a, bul ṭan vat a, player leh manager te hmuh a, fan-te tana khelh ka châk tawh hle. Fans ho pawimawhzia ka hria a, Craven Cottage-ah fan-ten nen intawn hlan ka nghakhlel hle a ni.

"He team tan hian ka theihtawp ka chhuah dawn a, inpawh taka kan awm ka duh. He hmun ka pan thei hi ka hlim hle a ni," a ti a, Fulham-ah a theihna tak tak pholan a inbeisei ang.

Chelsea academy chhuak Broja hian March 2020 khan senior team tana a match hmasa ber khelin, match 38-ah goal thum a khung tawh a, season hmasa chawhnu lam kha December 2022-a a khup hliam avangin a inlan thei lo.

Premier League-ah Fulham hi 12-na ni mekin, Chelsea aia hmun hniha hniamin, point rukin an phak lo mek bawk a, tun season-ah league goal 28 chiah la khungin, anni aia khung tlem team paruk chiah an awm - Blues tana goal thum chiah la khung Broja hi an mamawh chhanna a nih leh nih loh chu a hriat thuai ang.

Broja hian Fulham hmain Dutch club Vitesse-ah loan-in a lo khel tawh a, match 34-a inlanah goal 11 khungsakin, Southampton-ah 2021-22 season kha loan thoa khelin, match 38-ah goal kua a khung bawk. An ram Albania tan match 17 khel tawhin goal li a khung thung.

Hetihlai hian Chelsea midfielder Andrey Santos chuan French Ligue 1 club Strasbourg chu season tawp thleng loan-a khel turin a zawm bawk a, kum 19 mi player beiseiawm hian season ṭan dawn khan Nottingham Forest chu loan-in zawm mah se, match hnih chiah a khelh avangin Chelsea hian an kokir a ni.

Strasbourg neitute hi Chelsea neitu zinga mi Todd Boehly leh Behdad Egbahli an ni a, June 2023 khan club-a share tam zawk chu an ṭhian dun hian an lei dun.