All India Masters Ranking-a bronze medal latu Thanzuala

Lalthanzuala, Chanmari West chuan Yonex-Sunrise Maharaja Agrasen All India Masters Ranking Badminton Tournament 2024-ah bronze medal a hlap chhuak a, 55+ Men's singles huangah khelin pathumna a ni - inelna hi January 27 khan ṭan niin, nimin khan an zo.

Seeded no. 4 Thanzuala hia round of 32 ah Sawinder Singh chu 21-6, 21-16 a hnehin bul aṭan a, last 16-ah seeded no. 9 Prashant Mukherhjee chu straight set bawkin, 21-7, 21-19 in a hneh leh.

Mohali, Punjab-a neih inelnaah hian Thanzuala hian quarterfinal thlengin awlsam takin hnehna a chang vek a, quarterfinal-ah hian Nagaland shuttler leh seeded no. 5 Achumi Yakhuvi nen intawngin, 21-14, 21-11 (straight set) in hnehna a chang zui.

Semifinal-ah hian World Masters Badminton Championship 2023, South Korea-a 55+ Men's singles category-a champion Rajeev Sharma a tawng a, All India Masters Ranking Tournament, Udaipur, Rajasthan-a neih a nih ṭuma final-a a lo ngam loh tawh Rajeev lakah hian a tlawm nawn.

Mizoram Police Badminton Club (MPBC) player Thanzuala chuan, "World champion hlim a ni a, kan la inthlau deuh a ni. Min ṭawngṭaipui a, min lo ṭantute zawng zawng chungah lawmthu ka sawi," a ti a, Mizoram Badminton Association (MBA) chuan Thanzuala chu an lawmpui thu thuchhuah an siam bawk.