Ronaldo 'team' lakah Messi 'team' an zawr

Lionel Messi a luh meuh chuan Inter Miami khan Al Nassr lakah goal ruk an chhuah tawh a, danglamna a siam thei ta bik lo. Saudi Pro League team hian friendly match-ah 6-0 in hnehna an chang.

Ningani zan inkhel tur hi Messi leh Cristiano Ronaldo intawnna tur angin thawm a ring a, khawthlang chanchinbu mite chaw tui tak pawh a ni. Mahse, inkhelh hmain Ronaldo chu hliam vanga a inlan theih loh tur thu puan niin Messi pawh inhliam (?) vangin bench lamah a awm.

Saudi Pro League club tan Otavio-a'n minute thumna lekah goal khung ṭanin, Talisca chuan hattrick a siam bakah Aymeric Laporte leh Mohammed Maran ten goal khat ve ve an khung bawk.

Manchester City defender hlui Laporte hian yard 70 a hla tehmeuh aṭangin freekick a chhuih lut, anmahni lam aṭanga halfway line thlen hma daih aṭangin a pet a, goalkeeper Drake Callender awmna a fuh tawk lo chungin, a pet ṭha ve hrim hrim.

Ronaldo hi chawn hliam vangin a chawl mek a, a hliam vang hian China ramah pawh a zin theih loh tur thu an lo sawi tawh. Messi pawh inkhel turin a inpeih tawk lo, hun tawp dawna a inlan hram chhan hi sumdawnna thila inremna awmsa vang niin an sawi.