Ferrari zawm tur Hamilton

Lewis Hamilton chuan tun season thar lo awm tur tawp rualin Mercedes a chhuahsan dawn a, season tharah chuan Italian team hlun leh ṭha Ferrari a zawm ang - a contract hi ching taka ziah ni lo mah se, season khat aia rei a nih thu tarlan a ni thung.

Kum 39 mi Hamilton hian season hmasa ṭan dawn khan Mercedes tan kum hnih daih contract a ziak, an inremna hi tun season tawpah hian a zo dawn - season 11 chhung tehmeuh a chamchilh tawh hi a chhuahsan dawn a ni.

World champion vawi sarih ni tawh Hamilton chuan, "Mercedes hi ka nun nen a inzawm tlat a, a nihna takah chuan kum 13 mi chauh ka nih lai aṭang khan inzawmna kan nei tawh. Ka team duh leh ngaihsan a ni, chhuahsan tura thutlukna siam chu thil awlsam a ni lo.

"Amaherawhchu, hringnunah hian kan duh leh beisei ang vekin thil a thleng lo a, tun hi ka tan chuan chona thar hmachhawn tura thutlukna siam hun niah ka ngai," tiin Formula 1 chu chawlhsan mai a la tum rih lo.

Hamilton-a'n Mercedes chhuahsana Ferrari a zawmin hi F1 chanchina transfer lian ber a nih loh pawhih, a lian berte zinga mi chu a ni dawn chiang. A team tharah hian Charles Leclerc nen an inkawp dawn a, tun season tawp rualin Carlos Sainz-a'n Ferrari a chhuhsan ve thung dawn a ni.

Britain tlangval Hamilton hian kum 2013 khan McLaren chhuahsanin Mercedes hi a zawm a, a vanglai chuan khawvel driver ṭha filawr a ni - world champion nomawi pawh vawi sarih a chawi tawh, champion hnem lamah Michael Schumacher nen an intluk mek.

Mercedes car khalh chung hian intlansiak vawi 103 a hmachhawn tawh zinga 82 zetah hnehna a chang a, mahse tun hnaiah beisei a phak ta lo. Red Bull leh Max Verstappen te an rawn lang a, kum hnih chhung chu Hamilton hian chak ni hmel a hmu ta lo.

Driver champion hnem ber nih a duh a, mahse Max-a a tluk tak si lohah chuan kawng dang a dap a ngai. Tun season an hmabakah pawh hian Red Bull an chesual viau a nih ngawt loh chuan Hamilton tan champion beisei ngam a harsa ang.

Mercedes team principal Toto Wolff chuan, "Mercedes leh Hamilton inzawmna hi a thuk a, engtik niah emaw chuan kan sulhnute hi kan la thlirkir leh ang a, chhuang takin kan la sawi thei ngei ang," tiin a sawi.

Car intlansiakna sang ber season thar hi March 2, Pathianni aṭanga tlan ṭan a ni dawn a, inelna hmasa ber atan Bahrain International Circuit-ah Bahrain Grand Prix an tlan ang - Hamilton tan Mercedes car khalh chunga hun hnuhnung a nih dawn avangin a lunglenthlak ve khawp ang.