Tlai dar 5:00-ah Iran vs Japan

Asian Cup quarterfinal-ah vawiin tlai dar 5:00 hian Iran leh Japan te an inkhel dawn a, Education City Stadium-a inkhel tur en châkawm bik a ni ang. Zanin dar 9:00-ah inelna thlengtu Qatar leh Uzbekistan te an inhmachhawn bawk dawn.

FIFA ranking aṭanga thlir chuan Japan hi 17-na an ni a, Iran hi 21-na an ni thung. Khawvel team ṭha 25 zinga tel pha ve ve an ni a, an ṭha tih pawh a chiang.

Iran hian group stage-ah an khingpui an hneh vek a, amaherawhchu quarterfinal lut turin Syria chu penalty shootout hmangin an hneh hram. An player pawimawh Mehdi Taremi chu Syria an hmachhawn ṭum hian hnawhchhuah a ni a, Samurai Blue pawh a hmachhawn thei dawn lo.

Japan erawhin group stage-ah Iraq an hneh lo a, pahnihna nichungin last 16 an lut. Mahse, second round-ah Samurai Blue hian Bahrain 3-1 in an sawp a, an ṭhatzia an pholang leh tawh.

Asian football power-house pahnih ni mah se an inkhelh tawhna thlir chuan Japan buk a rit deuh. Asian Cup-ah vawi li an inkhel tawh a, Japan hi vawi hnih chakin ṭum hnih dangah an inhnehtawk.

Feyenoord tana khel mek Ayase Ueda-a'n goal li a khung tawh a, ani hi Japan innghatna tur a ni. Iran tana goal thum khung tawh Mehdi Taremi a khel thei dawn si lo a, goal hnih khung tawhtu Mehdi Ghayedi chu tlarhmaah a pawimawh ang.