Afcon Quarterfinal : A thlengtu Ivory Coast fiahin an awm dawn

Tun hma chuan Ivory Coast hian player hrawl leh langsar pui pui an kawl khawm ṭhin a, ram dang tana hmachhawn chakawm lo leh huphurh awm tak an ni ṭhin, tunah erawh team hlauhawm tak tia sawi tur an ni rih lo.

Afcon thlengtu Ivory Coast hian zanin dar 10:30-ah Mali an hmachhawn dawn, beisei anga tournament an khelh ṭhat rih loh avangin Elephants (Ivory Coast sawina) tan fiahna a ni dawn - West African Derby hi a boruak a nung khawp ang.

Ivory Coast hian kum 1992 leh 2015 khan Afcon nomawi an chawi, a hnu lamah erawh an la hlawhtling leh rih lo. Kuminah hian group stage an khel ṭha lo, ram dang result ngaichang chungin an tlang hram.

Mahse, last 16-ah team ṭha leh champion tura rinkai zinga mi Senegal an hneh thei tlat. Senegal an hneh ṭum hian AC Milan leh Barcelona tana khel tawh midfielder Franck Kessie a hmuhnawm, zaninah pawh a pawimawh leh khawp ang.

Emerse Fae-a enkawl Ivory Coast hian Senegal an hneh ṭum hian, bench lamah Sebastien Haller, Simon Adingra leh Nicolas Pepe te an la dah thei a, an squad chu a la chhah tawk tihna a ni, zaninah pawh rinkai zawk an ni dawn.

Mali hian Burkina Faso hnehin quarterfinal hi an lut a, Africa rama inelna lianah hian an thlen san ber chu kum 1972 kha niin pahnihna an ni - kum 2012 leh 2013 khan pathumna dinhmun an luah bawk, la champion chiah lo mah se an sulhnu hi a chhe lo.

Tottenham Hotspur midfielder Yves Bissouma chu mual laia Mali inkhel khaikhawmtu pawimawh a ni leh dawn. Premier League season kal laia midfielder hmuhnawm zinga mi a ni phak a, an ram tan chuan thlamuanpui tham a ni.