Joselu goal hnih hmangin Real chak

Real Madrid chuan Spanish La Liga hmahruaitu ni turin Getafe chu 2-0 in an hneh a, veteran striker Joselu chuan goal hnih a khung - Real-in hnehna an chan avangin table chung berah an awm a, an hnuai chiaha awm Girona aiin point hnihin an sang.

Joselu hian minute 14-naah Lucas Vazquez-a hnathawh ṭhat zarzoin goal hmahruai a khung a, minute 15-naah Vinicius Jr-a siamsak chu Joselu bawk hian goal-ah a chantir bawk - hun tawp thlengin goal dang a awm tawh lo a, 2-0 in Real an chak.

Kum 33 mi Joselu hian season ṭan dawn khan season tawp thleng loan-a khel turin Real hi Espanyol aṭangin a zawm a, mi tam takin rinhlelhna nen an thlir. Mahse, tun season inelna hrang hrangah match 31 khela goal 12 khungin, assist vawi li a nei.

Getafe hian Mason Greenwood leh Borja Mayoral hmangin si phurh sut theihna remchang an nei a, mahse, post an tihper ve ve avangin kut ruakin an bu zawlah an tlawm.

Real Madrid hian Pathianni zan dar 1:30-ah league match khel turin Atletico Madrid an mikhual zui dawn a, a awlsam lo ang - tun season-ah team pahnih hi vawi thum an intawng a, Atletico hi vawi hnih an chak.

La Liga-a an intawn hmasakah Atletico Madrid khelmualah intawngin, 3-1 in Atletico hi an chak a, Copa del Rey round of 16 aṭangin Atletico hian 4-2 in an pet chhuak bawk.

Mahse, Spanish Super Cup final-ah khan Real-in 5-3 in hnehna an chang ve thung a, Pathianni zan an inkhel tur pawh result tur sawi lawk a harsa.