Inter Milan mualah Juventus

Pathianni zan dar 1:15 hian Inter Milan chuan Juventus an lo mikhual dawn - tun season atan chuan Serie A inkhel pawimawh ber ang hial chhal theih a ni ang, chuvangin 'Serie A Final' tiin a sawi ngam.

Tun dinhmunah chuan Inter hian Juve lakah point khatin hma an hruai, an chak a nih chuan a vawi 20 nana Italian champion ni turin an dinhmun a ṭha ang - Old Lady lamin Scudetto lak an duh a nih chuan an chak ngei a pawimawh thung.

Team pahnih hian tunlai striker ṭha pahnih an khawl a, hei hian inkhel a ti hmuhnawm ang. Inter Milan hmatawng Lautaro Martinez-a'n tun season Serie A match 19 a khelh aṭangin goal 19 a khung tawh, zaninah pawh Juve tan ven ngun a ngai dawn.

Argentina international Martinez-a'n season duhawm hmangin a team chu league hmahruaitu a nih pui mek. Juve pawhin goal 12 khung tawh Dusan Vlahovic an nei - Serbia international hian a league match hnuhnung parukah goal sarih a khung.

Italian team ṭha pahnih, champion tuma inum lai - goal khung thiam leh anmahni lama lut tur ven thiam pahnih an ni a, inkhel a hmuhnawm ngei ang.