Table chung berah FC Goa

Tun season ISL-ah FC Goa-in tlawm an la nei lo tluang zel - Ningani zan khan an mikhualna ramah Hyderabad chu 2-0 in an hneh a, table chung berah an awm zui.

Goan club tan Carlos Martinez chuan goal hnih a khung a, mualneitu Hyderabad lamin a chhanletna tur an nei thei lo. Team pahnih boruak a inthlau hle. Goa-in hnehna an chan avangin table chung ber an luah a, Hyderabad erawh table mawngphahah an awm.

FC Goa-in tlawm an la neih loh laiin Hyderabad erawh chak la nei lo an ni thung a, sum lama talbuai mek team hian hlawh pek loh chungchangah an player langsar an chân nual bawk avangin table mawngphahah season an khar a nih pawhin a mak lo ang.

Hyderabad tan hian defender Mark Zothanpuia, midfielder Lalchhanhima Sailo leh attacking midfielder Ramhlunchhunga ten inkhel bul an ṭan a, bench aṭangin forward Aron Vanlalrinchhana chu luhtir a ni bawk - Cherhlun rawlthar Aron-a tan ISL-a a match hmasa ber a ni.

FC Goa lamah Ayush Chhetri a inlan bawk a, Dinthar tlangval hian tun season-a league match li a khelhna chiah a ni - season hmasa khan league match 20 a khel thung.