Afcon Semifinal-ah Ivory Coast, DR Congo, Nigeria leh South Africa

A thlengtu Ivory Coast chuan hun tawp dawna Oumar Diakite-a goal hmangin Mali chu 2-1 in an hneh hram a, harsa takin Africa Cup of Nations 2023 semifinal an lut a, final lut tur chuan DR Congo an paltlang leh a ngai dawn a ni.

Africa ramte football hmanga inelna lian leh sangah hian a thlengtu Ivory Coast bakah Nigeria, South Africa leh DR Congo ten semifinal an lut. A thiam palite hi February 7, Nilaini zanah an inel chhunzawm leh ang.

Ivory Coast an vannei

Inrinni zan quarterfinal inkhelah Ivory Coast tan thil a awlsam lo, chawlhlawk hmain defender Odilon Kossounou chu yellow card pahnihna hmuh vanga hnawhchhuah a ni der tawh, hun chanve chawhnu lam chu a tlem zawk ni chunga an khelh a ngaih phah.

Minute 71-naah Mali lamin Nene Dorgeles-a goal mawi hmangin hma an hruai a, an ke lehlamin semifinal an rap tiin a sawi theih. Mahse, hun pangngai tawp hma chiahin Simon Adingra chuan Elephants tan goal pawimawh khungin si phurh a sut.

Extra time khelh zui a ni a, extra time tawp dawnah Ivory Coast bawk an vannei - Diakite chuan chakna goal a khung. Seko Fofana-a shot ṭha tak mai chu a lo kheng pial lut a, goal khung a lawm nan hian a jersey a phelh.

Diakite hian a hmain yellow card a lo hmu sa tawh, card a hmuh leh avangin hnawhchhuah a ni a, hun a tawp zui. Hamrik hnuhnung rik hnuah Mali player lungawi loten referee Mohamed Adel an bawr zui a, nungchang mawi lo Hamari Traore chu red card pek a ni zui ve bawk.

Chak lo Mali tan thawnthu lungchhiat thlak a ni, tun hmain Afcon quarterfinal hi vawi nga khel tawhin an chak vek. Tun ṭumah hian group hmahruaitu ni chungin an tlang chho a, goal an neih hmasak bakah player tam zawk an ni, hetiang chunga an chak lo hi tawrh thiam a harsa ang.

Nigeria tan Lookman

Ademola Lookman chu Nigeria tan mamawh channa a ni leh ta. England Under 21 tana khel tawh, mahse senior team lamah chuan Nigeria tana khel ta zawk hian Angola lakah goal awmchhun khungin an ram hi 1-0 in a chakpui.

Serie A club Atalanta winger hian minute 41-naah Moses Simon-a siamsak chu box chhung aṭangin a duh tawkin a pet lut. Last 16-ah khan Cameroon 2-0 a an hnehna goal pahnih chu a lo khung tawh bawk, hun pawimawhah a che fuh thei hle.

Nigeria tan beisei anga Afcon khel ṭha rih lo Victor Osimhen-a'n an goal hnihna khungah a inngai, mahse video assistant referee (VAR) hmanga ennawn a nih hnuah offside vangin an hnawl - African footballer of the year Osimhen a la vannei hleithei lo.

Semifinal an luh hnuah Nigeria coach Jose Peseiro chuan, "Kan naute khan hnehna hlu tak an sual chhuak, thil tum mumal tak kan neih hlen chhuak turin theihtawp takmeuh an chhuah, an laka rinna ka nghah chu min tithlawn lo," a ti.

Angola coach Pedro Goncalves chuan an chak lohna a pawm thiam a, an khingpui Nigeria chu chak phu zawk an nih thu a sawi. World number 117 ni chungin 2019 champion Algeria leh Burkina Faso te chunga awmin group hmahruaitu an ni thei a, an thlen china an lawm hi a mak lo.

South Africa vannei

Goal a luh loh avangin penalty shootout hmangin chak zawk an zawng a, hun pawimawhah South Africa captain Ronwen Williams chuan a mawhphurhna a rawn hlen, penalty vawi li ngawt dangin an ram hi Cape Verde lakah 2-1 in a chakpui!

Williams-a hian Bebe, Willy Semedo, Laros Duarte leh Patrick Andrade te pet a dansak vek. Cape Verde goalkeeper Vozinha chuan Mihlali Mayambela leh Teboho Mokoena te pet dang ve bawk mah se South Africa an chungnung ta zawk.

Quarterfinal inkhel dangah DR Congo chuan Guinea 3-1 in an hneh ve thung. Guinea lamin Mohamed Bayo hmangin goal nei hmasa mah se, Congo defender Chancel Mbemba-a'n a sut bakah Yoane Wissa leh Arthur Masuaku ten an khung belh.

DR Congo hi an vannei chho hle, inelna neih laiah hian quarterfinal hma khan match pali an khelhah hun pangngaia chak an nei miah lo. Egypt chu penalty hmangin an hneh a, tun ṭum hi hun pangngaia an chak vawi khatna a ni hial.