Asian Cup semifinal khel tur Jordan, South Korea, Iran leh Qatar

Asian Cup 2023 quarterfinal chu khelh zawh a ni tawh a; football ram langsar Australia leh Japan te an tla. Inelna thlengtu Qatar bakah Jordan, South Korea leh Iran ten semifinal an lut.

February 6, Thawhlehni zan dar 8:30-ah Jordan leh South Korea ten semifinal hmasa zawk an khel ang a, February 7, Nilaini zan dar 8:30-ah Iran leh Qatar ten final khel tur an zawng leh ang.

Jordan an kaltluang

Ahmad bin Ali Stadium, Al Rayyan-ah Jordan leh Tajikistan inkhel en turin mi 35,530 an pung khawm. Team pahnih hi Asian Cup-a an vawi khatna a nih bakah semifinal la lut ngai lo ve ve an ni.

Jordan-in inkhel bul an ṭan ṭha a, an chance neih erawh an hmang ṭangkai thei lo. Minute 66-naah Jordan-in goal an khung a, an vannei tel. Mahmoud Al-Mardi corner pet chu Abdallah Nasib-a'n tauhin Tajikistan defender Vahdat Hanonov awm a per zarah goal-ah a lut. Goal khat hi Jordan semifinal luh nan a tawk.

South Korea hero Son

Asia rama football thiam ram pahnih Australia leh South Korea te Al Janoub Stadium, Al Wakrah-ah an inkhel a, entu zat pawh 39,632 an ni. Team pahnih hi Asian Cup-ah kum 2015 hnua an intawn leh hmasak ber a ni a, Australia-in inelna a thlen kum hian Socceroos-in group stage-ah hneh lo mah se final-ah hnehin nomawi an chawi.

Tun ṭumah hian South Korea hian ball chang tam mah se Australia-in goal hlauhawm an nei zawk. Socceroos hian minute 42-naah team goal ṭha zet an khung a; South Korea box chhungah Mitchell Duke, Connor Metcalfe leh Nathaniel Atkinson ten ball an inpe kual a, Atikinson-a vawrh luh chu Craig Goodwin-a'n a volley goal.

Minute 90 a nih pawhin Australia hian 1-0 in hma an la hruai a, mahse injury time-ah Tottenham Hostpur forward Son Heung-min-a'n Australia defender Lewis Miller lakah penalty a hlawh chhuak. Hwang Hee-chan-a'n si phurh sutna goal a khung a, extra time khelh a ni zui.

South Korea captain Son Heung-min-a'n a thiam thil lantirin minute 104-naah freekick aṭangin a khung. Socceroos midfielder Aiden O'Neill chu extra time first half-ah hnawhchhuah a ni a, South Korea-in 2-1 in hnehna an chang.

Japan ngamtu Iran

Asian football powerhouse pahnih Iran leh Japan te chu Education City Stadium, Al Rayyan-ah an inhmachhawn a, mipui 35,640-in an en. Hajime Moriyasu kaihhruai Japan-in na takin an nawr nghal a, ball an chan tam rah an seng. Minute 28-naah Hidemasa Morita-a'n Iranian player pathum vel zet patlangin goal ṭha bik a khung.

Second half-ah Iran an insiamṭha a, minute 55-naah Sardar Azmoun ball pass fing zet chu Mohammad Mohebi-a'n si phurh sut nan a hmang. Inkhelh kalhmang a danglam ta daih a, Japan an chungnung ta bik lo.

Iran goal bawh a na tawh zawk a, goal chance pawh an ngah. Injury time-ah Japan tlarhnung an chesual a, defence laia ding Takehiro Tomiyasu leh Kou Itakura te an inringthul. Itakura insiamṭhat tumin penalty a chawi. Alireza Jahanbakhsh-a'n injury time-ah pawh minute ruknaah chakna goal a khung.

Inelna thlengtu Qatar

Al Bayt Stadium, Al Khor-ah inelna thlengtu Qatar-in Uzbekistan an hmachhawn a, hun pangngaiah 1-1 a ni. Minute 27-na lekah Almoez Ali back heel chu Hassan Al-Haydos-a'n a khalh lut a, catpain Al-Haydos cross chu keeper Utkir Yusupov-a'n man pialin an lamah a lut.

Uzbekistan hian first half-ah si phurh sutna tur hun ṭha bik an hlah a, mahse minute 59-naah si phurh an sut. Qatar defender-ten an tihtur ti tawk lo mah se Odiljon Hamrobekov-a finishing a ṭha a, Uzbekistan-in an phu ang ngeiin goal an khung.

Extra time-ah pawh goal a luh belh tawh lo a, penalty shootout-ah Qatar tan Almoez Ali leh Al-Mahdi Ali Mukhtar ten an hlah. Uzbekistan aiawha pet ten an la hlah hnem zawk. Rustam Ashurmatov-a'n a hlah hnuah a hnuhnung pahniha pettu Zafarmurod Abdurakhmatov leh captain Jaloliddin Masharipov ten an hlah. Qatar goalkeeper Meshaal Barsham chu hero a ni.