Kan bulah Haaland a hlim - Guardiola

Manchester City manager Pep Guardiola chuan a striker hman thiam Erling Haaland chu Etihad Stadium-ah a hlim tih a sawi a, tun hnaia Haaland a hlim lo anga sawi ṭhin chu a hriat ve loh thu a sawi.

Norway international Haaland hi hliam vangin hun rei tak a chawl a, tun hnaiah a lo kir leh tawh. An match hnuhnung bera Burnley an hneh ṭumin bench aṭangin a lut leh thei tawh a, zanina Brentford an tum hunah chuan bul a ṭan theih tawh a rinawm.

Guardiola chuan, "Spanish chanchinbu miten kan hnenah Haaland a hlim lo angin an sawi a ni mai thei, kei chuan hemi thu hi chu ka hre ve lo. A hrechiang duh tan chuan Madrid lama va zawh mai a ngai ang, a chhan chu an hriat ang hi kan hre ve lo.

"Kan hnena a lo kal aṭangin a theihna sang leh ropui tak a lantir a, a chet dan hi player dangte aia hlauhawm a nih avangin club dangin an hnena khel tura an duh pawh hi a mak ka ti lo, hetiang thuthang hi chu awm ve tur a ni," a ti.

Haaland awm loh karah Julian Alvarez chuan goal khung kawngah Man City mamawh a lo phuhru thei a, tunah chuan an khel kawp thei tawh ang - Spanish manager Pep hian season tir lam khan a chhawr dun ṭhin.

Brentford laka bul ṭan tur an zawhna chhangin Pep chuan, "Inkhel bul ṭan turin Erling a inpeih, amah chauh ni loin player dangte pawh an inpeih, a chhan chu an hliam a dam tawh miau a ni," tiin a sawi.

Man City tan Brentford hi awlsam taka nuai liam tum ngawt chi an ni dawn lo, kum 2022 November thla khan Etihad Stadium-ah Bees hian 2-0 in hnehna an chang tawh a, an goal pahnih khungtu Ivan Toney chu zanin hian a inlan thei dawn - English striker hi ven ngun a ngai hle ang.

Premier League champion lai Man City hian zanin dar 1:30 hian Brentford an mikhual dawn, inkhel hmunhnawm an chawp chhuak leh ngei ang.