Premier League-ah goal a lut hnem
Inrinni zan Premier League inkhelah goal a lut hnem a, inkhel a hmuhnawm hlawm hle - Newcastle United-in an hneh ngei tura ngaih Luton Town lakah goal li ngawt an chhuah a, mahse, goal li an khung ve tho avangin 4-4 in an inhnehtawk.
Magpies tan Sean Longstaff chuan goal hnih a khung a, Kieran Trippier chuan August 2022 hnua a vawi khat nana goal khungin, Harvey Barnes chuan goal khat a thawh ve bawk - Luton tan Gabriel Osho, Ross Barkley, Carlton Morris (penalty) leh Elijah Adebayo ten goal khat ṭheuh an khung thung.
Inrinni zan inkhel dangah Aston Villa chuan goal nga ngawt khungin, Champions League khelh an beiseina an chhi nung ve zel a, Sheffield United chu 5-0 in an sawp - Villa tan hian John McGinn, Ollie Watkins, Leon Bailey, Youri Tielemans leh Alex Moreno ten goal khat ṭheuh an khung.
A sur sung sung
Newcastle-in vawi hnih ngawt hma an hruai a, a tawpah erawh 4-2 a hnufual zawk niin, 'comeback' mamawh zawkah an ṭang a, St James' Park-a inkhel hi beisei phak bakin a hmuhnawm. Magpies hian minute sarihna lekah Longstaff hmangin goal hmahruai an khung a, "An chak ang em?" tih ai chuan, "Eng zat tak khung belh ang maw?" tih chu zawhna zawk a ni.
Mahse, Newcastle khelmualah Luton-in chak an tum ngam a, defender Osho chuan minute 21-naah si phurh a sut. An hlim chhung erawh rei lo tak a ni - Longstaff hmang bawkin Magpies hian goal an khung leh a, goal an chhuah aṭanga minute hnih hnu lawkah hma an hruai nawn.
Luton-in tlawm erawh an tum bik lo. Minute 40-naah Alfie Doughty-a 'shot' Martin Dubravka-a dan per chu Barkley chuan si phurh sut nan a khung ve leh a, goal dang lut loin chawlhlawk hman zui a ni.
A hunah tak
Second half a ni a, Luton chu goal khung hmasa zawkah an ṭang ve ta zui. Dan Burn chu khel ṭha em em mai Chiedozie Ogbene lakah a foul niin a lang a, video assistant referee rawn a nih hnuah penalty spot kawh a nih avangin Morris chuan penalty hi goal-ah a chantir.
Minute 62-na a ni a, Luton bawkin goal an khung nawn. Elijah Adebayo chuan mikhual team goal lina a khung a, 4-2 a ni der. Mahse, mahni mualah Magpies-in tlawm an duh bik lo - hun harsaa an team khai chhuak ṭhintu Trippier kan hmu a, minute 67-naah si phurh a sut ṭhen.
A la tawk zo lo cheu - minute 73-naah Barnes a inlar ve leh a, thla nga zet hliam vanga a chawlh hnuah pawh a goal khung châkna a la thamral lo tih pholangin Barnes hian si phurh sutna goal a khung a, goal dang lut loin hun a tawp a, team pahnih an inhnehtawk.
Hei le Villa
Villa-in Champions League khelh an tum tih an pholang nawn a, Premier League mawngphah luahtu Sheffield United chu 5-0 in an sawp - table-ah palinaah an awm a, nizana Liverpool nena inkhel Arsenal nen an point hmuh zat a inang.
Unai Emery enkawl team hian minute 12-naah McGinn hmangin goal an khung ṭan a, minute 16-naah Watkins chuan a belhchhah zui - Watkins hian minute 20-naa Bailey leh minute 30-naa Tielemans khung tur a siamsak zui a, first half-ah 4-0 in hma an hruai der.
Watkins hian tun season inelna hrang hrangah match 32 khela goal 16 khungin assist vawi 12 a nei der tawh a, English football-a striker 'hot' ber pawl a ni mek. Villa hian minute 47-naah Moreno hmangin an khung leh a, Sheffield khelmualah an chak nuamsa hle.