Everton mualah Spurs chak zo lo

Tottenham Hotspur-in Richarlison hmangin vawi hnih ngawt Everton lakah hma hruai mah se, Merseyside club hi an si phurh an sut zawhtir ve ve a, 2-2 in an inhnehtawk.

Spurs tan Richarlison chuan minute linaah tawih zetin goal hmahruai a khung a, minute 30-naah Jack Harrison chuan corner aṭanga ball kal hmangin Everton tan si phurh a sut.

Mahse, Spurs tan Richarlison bawk inlarin, minute 41-naah a club hlui lamah a khung leh a, 2-1 a ni. Spurs hian hnehna an chang mai dawn niin a lang hman a, mahse, hun pek belhah Jarrad Branthwaite chuan khung ve lehin, Everton-in si phurh an sut zo.

Spurs tana lawmna tur erawh Richarlison a khel ṭha tluang zel hi a ni a, Brazilian forward hian Asian Cup khelh vangin Son Heung-min thangbo mah se, mawhphurhna a la thei tih a pholang.

Richarlison hian July 2022 khan pound maktaduai 60-in Everton aṭangin Spurs hi a zawm a, hei vang hian Everton laka a goal khung pahnih pawh hi lawm loin, fans hnenah ngaihdam a dil zawk - fans lam pawhin an player hlui hi an zahna an lo lantir.

Brazil international hian Spurs a pan hnuah beisei a phak lo a, a league match hmasa 39-ah goal hnih chiah a khung. Mahse, tun hnaiah a theihna tak tak pholangin, league match a khelh hnuhnung pakuaah goal riat a khung ta.

Spurs boss Ange Postecoglou chuan, "Richy a khel ṭha ṭhin hle a, team tan a thawhhlawk em avangin fak pawh a phu a ni. A thawhrim em avangin hei aia ṭha zawk hian a la khel zel ang," a ti.

kum 26 mi Richarlison hi a vanneih zan ni se, hattrick siam thei dinhmunah a ding hial a, mahse, Everton keeper Jordan Pickford chuan ṭha zetin a dansak - English keeper Pickford hi a che ṭha hle.

England tana a khelhpui James Maddison-a goal khung ngei tur nia lang chu vawi hnih a dang a, Pedro Porro hun ṭha neih chu Pickford hian engmah lo maiah a chantir bawk a, Everton chhanhimtu tia sawi pawh a awm lo hran lo.

Spurs-in hnehna an chan zawh loh avangin table-ah pangana an ni mek a, Villa chu khelh zat inangah point hnihin an phak lo mek. London club hian league match hmasa 10-ah tlawm nei loin season bul an ṭan a, an che ṭha hle.

Mahse, hemi hnuah hian league match nga zet chu a zawnin an chak zo lo a, an tlahniam hman. Tun hnaiah insiamṭha lehin, an league match hnuhnung pariatah vawi khat chiah an la tlawm a, champion an la sawi ri ve reng.