Isak-a'n a vanglai a hmang

Odisha FC forward Isak Vanlalruatfela chu ISL Emerging Player of the Month atan thlan a ni a, December thla chhungin ISL-ah ani aia Indian player ṭhangduang khel ṭha zawk an awm lo.

Isak-a chuan, "Pathian khawngaihna vang liau liau a ni," tiin Vanglaini a hrilh a, ISL Emerging Player of the Month-a thlan a ni chu a lawm thu a sawi.

December thla khan Odisha hian ISL match ruk khelin tlawm an nei lo a, vawi li chakin vawi hnih draw an nei. Match rukah hian Isak-a hi inlan vekin, player pawimawh a ni a, goal khat a khung bakah assist vawi hnih a nei.

Thingsulthliah/Bawngkawn tlangval Isak-a hian ISL Emerging Player of the Month hi February 2023 khan a lo dawng tawh bawk a, tun season-ah a chet ṭhat chhunzawmin award-in a zui zel.

Kalinga Super Cup khelh zawh takah khan Odisha FC chu final hruai thlengin, nomawi chawipui ta chiah lo mah se Player of the Tournament-ah thlan a lo ni tawh bawk.

Isak-a hian tun season inelna hrang hrangah match 23 khelin goal nga a khung tawh a, assist vawi thum a nei - Mizo forward hian season duhawm zawk hman zel a beisei ang.

Odisha hian Zirtawpni zan khan ISL match-ah Kerala Blasters chu hmachhawnin, 2-1 in an hneh a, December thlaa Player of the Month-a thlan Roy Krishna chuan kum tharah pawh a chet ṭhat chunzawmin goal hnih a khung.

Blasters hian Dimitrios Diamantakos hmangin goal hmahruai khung mah se, second half-ah Odisha-in Krishna goal hnih hmangin an chhanglet a, he inkhelah hian Jerry Lalrinzuala, K. Lalṭhathanga (Puitea) leh Isak-a ten inkhel bul an ṭan.