Bayern leh Leverkusen an inpeih ta

Bundesliga-ah Bayer Leverkusen-in Nathan Tella goal hnih hmangin Darmstadt 2-0 in an hneh a, Bayern Munich-in Borussia Monchengladbach 3-1 in an chak ve bawk. Xabi Alonso kaihhruai Leverkusen hian February 10, Inrinni hian champion lai Bavarians an mikhual dawn a, Bundesliga final tia sawi theih inkhel pawimawh atan team pahnih hi an inpeih.

Leverkusen hian match 20-ah point 52 an hmu tawh a, chak loh an la nei lo. Thomas Tuchel-a kaihhruai Bayern hian point 50 an hmu a, Leverkusen nen point hnih chauhin an inthlau. BayArena-a an inkhel tur hi pawimawh takzet. Bayern-in Leverkusen an hmachhawn tur chauh an thlir theih tawh laiin Alonso hote erawhin DFB Pokal-ah February 6, Thawhlehni zan hian VfB Stuttgart an mikhual phawt dawn.

Tella goal hnih

Merck-Stadion am Bollenfalltor-ah Leverkusen an lenglut a, Bundesliga hmahruaitu Leverkusen hian an mikhualna hmunah inkhel an thunun. Leverkusen hian minute 32-naah Nathan Tella tauh luh hmangin hma an hruai a, he goal luhna tura Darmstadt tlarhnung a ṭhiah dan chu a mawi danglam hle. Xabi Alonso thluak ṭhatzia a lang daih!

First half-ah 1-0 a ni a, second half minute 52-naah Tella hmang bawkin an khung belh a, English winger Tella ball pet a kawh takzet. Kum 24 mi Tella hi Arsenal leh Southampton youth academy-a a awm hnuin Saints senior team-ah a tel a, Burnley-ah loan-in a kal tawh. Tun season ṭan hma khan Leverkusen-in pound maktaduai 20-in an lalut a, an ṭhatpui hle. Leverkusen hi 2-0 in an chak a, Tella goal ve ve a ni.

Bayern tan Kane

Bayern Munich-in champion zia an la chhuah hlei thei lo a, Allianz Arena-ah Borussia Monchengladbach lakah an talbuai hle. Thomas Tuchel-a hote hian inkhel bul erawh an ṭan ṭha a, Leroy Sane-a'n crossbar a pet per bakah Harry Kane-a freekick chu a goal teuh viau bawk.

Mahse, minute 35-naah Nico Elvedi leh Jordan Pefok ten wall pass hmangin Bayern tlarhnung an ṭhiat a, Elvedi hian ṭha zetin Gladbach hmahruaina goal a khung. Point thum mamawh Bayern-in kum 19 mi Aleksandar Pavlovic hmangin minute 45-naah siphurh an sut.

A hunah tak Bayern-in siphurh an sutah a ngai theih a, chakna goal khung turin second half pum an nei. Amaherawhchu Bayern-in goal khung an harsat a, Moritz Nicolas tihsual zarah an vannei. Nicolas tih per hi Kane-a'n a tauh lut.

Minute 86-naah Sane freekick chu Matthijs de Ligt-a'n a tauh goal a, Bayern 3-1 in an chak. Kane-a'n Bundesliga-ah goal 24 a khung tawh a, England captain hian goal a khung chhunzawm zel chuan record siam tur a a nei nual. Mahse, Kane hian record aiin nomawi a ngai pawimawh ang.