Goal leh red card hlawhtu Vitor Roque!

Osasuna laka Barcelona chakna goal a khung hnu lawkah Vitor Roque chuan Barca tan goal a khung lehnghal a, tun ṭum erawh red card a hlawh chhuak tel thung!

Barca hian Alaves chu khualmualah 3-1 in an hneh a, kum 18 mi Roque hma hian Robert Lewandowski leh Ilkay Gundogan te chuan goal khat ve ve khungin, Alaves tana Samu Omorodion-a goal khung awmchhun chu scoreline cheimawina mai a ni.

Hetihlai hian Girona chuan Real Sociedad lakah hnehna chang zo loin, 0-0 in an inhnehtawk a, La Liga table-ah pahnihna an nih chhunzawm - Barca nen an inkarah point ruk chiah a awm ta thung a, season thara Champions League khelh tum team tan result ṭha a ni lo.

Barca an chak

Catalan club-in khualmualah goal khung turin hun an mamawh rei lo a, Robert Lewandowski chuan minute 22-naah goal hmahruai hi a khung - Manchester City captain hlui Gundogan-a siamsak a ni a, Lewy tan tun season-a league goal kua a khungna chiah a ni bawk.

First half-ah goal dang lut lo mah se, second half minute lina lekah Barca hian goal an khung lehnghal a, Lewy-a khung tur siamsaktu Gundogan chuan Barca goal hnihna hi a khung.

Mahse, Alaves an awm mai mai bik lo. An goal hnihna an chhuah aṭanga minute hnihna lekah Samu chuan si phurh a rawn sut ṭhen a, mahni mualah beiseina an nei thar.

Mahse maw...

Alaves beiseina neih chhung erawh rei lo tak a ni. Kum 18 mi Roque chuan Barca goal thumna a khung ve leh a, January-a Barca zawmtu forward hian league match nga a khelhah goal hnih a khung ve ta chiah.

Mahse, Brazilian forward hi a hlim chhung a rei lo. A kiua Nahuel Tenaglia-a nghawk avanga yellow card a hmuh hnuah, Rafa Marin laka a foul avangin a yellow card pahnihna a hmu leh a, hnawhchhuah a ni.

A tawp thleng Barca an ṭang thei hram a, 3-1 in an chak. Barca boss Xavi chuan, "Tlarhnungah kan khel ṭha a, 2-0 a nih khan kan thuhnuaia game dah thei tur kan ni a, mahse, goal kan chhuah zui - kha khan mintilungawi lo. A pumpui thlir erawhin kan ti ṭha viau e," a ti a, result-ah a lawm.