Harsa takin kan chak hram - Luis Enrique

Paris Saint Germain chuan Inrinni zan khan Strasbourg 2-1 in an hneh a, coach Luis Enrique chuan khualmual aṭangin harsa takin point thum an hlawh chhuak hram tih a sawi.

Stade de la Meinau-a inkhelah Strasbourg-a ball pet chhuah sual chu Marco Asensio chuan a lo dang per hman a, ball per chu Kylian Mbappe chuan goal ruakah nuamsa takin a khung, chawlhlawk laiin si khat faiin hma an hruai.

Second half tirah Paris club tan Asensio-a'n cool zetin an goal hnihna a khung. Goal hnih an chhuah hnuah Strasbourg lamin phurh belh huamin an nawr, forward Dilane Bakwa-a'n hnai tak aṭangin a tlawh lut a, goal dang erawh an khung belh thei tawh lo.

PSG coach Enrique chuan, "Kan tan chak kha a harsa ve hle, a bik takin hun tawp dawnah khan kan buai zual. Goal hnih kan phurh hnuah khan engmah hlauh nei loin min bei let a, keini lamin goal thumna kan khung thei mai bik lo thung.

"Strasbourg kha team ṭha an ni a, a lawmawm zawnga kan thlir chuan anni hnen aṭanga point thum hmuh theih kha a lawmawm. Player kan siksawi leh insiamrem karah kan chak, hei hian rah ṭha a chhuah ang," a ti.

PSG hian tun season Ligue 1 match 20 aṭanga point 47 hmuin table hmahruaitu an ni a, anmahni hnaih bertu Nice chuan match khata khel tlem zawk chungin point 38 an nei thung - PSG hian nomawi an humhim theih ngei a rinawm.