Arsenal lakah Liverpool an Tlawm!

Premier League nomawi inchuh boruak a sang - Arsenal chuan hmahruaitu Liverpool 3-1 in an hneh a, an inkarah point hnih chauh a awm ta, khelh hmabak match 15 a la awm.

Bukayo Saka, Gabriel Martinelli leh Leandro Trossard ten Gunners tan goal an khung a, defender Gabriel chuan anmahni lamah a tilut palh bawk. Hun tawp dawnah Liverpool defender Ibrahima Konate hnawhchhuah a ni.

Mikel Arteta naute tan point thum hlu bik a ni a, champion an beiseina a nung thar leh bawk. Chutihrualin, North London club chak hi Manchester City tan a lawmawm ang; Pep Guardiola naute an hmabak pahniha an chak chuan a chung berah an awm dawn.

Laipui a puak

Arsenal lamin chak loh a pawi thui dawn tih an hria - Krismas hnua an chet chhiat em avangin an dinhmun a ṭha lo, chak lo ni se la chuan Liverpool nen an inkarah point riat a awm thei dawn, chetsual a remchang tawh lo.

Emirates Stadium boruak a nung ṭha, a tir aṭangin na takin an nawr nghal. Mikel Arteta chuan Gabriel Jesus aiah Kai Havertz chu tlarhma laiah a rawn dah - Reds defender ten an beisei loh zawk an ven a ngai ta tlat.

Martin Odegaard-a ball fing dawngtu Havertz-a'n goal keeper Alisson chauh a hmachhawn tawhah a khung lo, mahse ball per dawngtu Saka chuan a lo khung daih, awmna tur hmun dikah a awm.

Gunners lamin inkhel an thunun zui a, mahse chawlhlawk hmain tihsual an nei. William Saliba-a'n harsa vak loa chin fel theih turin Luis Diaz a zuam sual niin a lang, goalkeeper David Raya-a'n rang taka ball manna chang hre loin awm hmunah a ding rei bawk!

Colombian forward Diaz-a'n harsa takin amah vengtu Saliba helin ball a pet per hman hram a, defender Gabriel-a'n anmahni lamah a kutin a vai lut - Reds lamin chawlhlawk hmaa target zawna ball an neih awmchhun a ni hial.

A hmuhnawm

Jurgen Klopp-a'n chawlhlawk laiin a naute a fuih ṭha tih a chiang, second half an rawn ṭan leh chiah chu Liverpool inkhel a danglam daih, hun eng emaw tichhung chu goal nawr na zawkah an ṭang.

Mahse, hun pawimawh lai takin tawnhriat nei ṭha Virgil van Dijk a chesual tlat. Dutch defender hian Martinelli a veng hneh lo a, ball pet chhuah tum keeper Alisson-a'n ball khawih fuh loin a zuang thlawn.

Reds defender leh keeper chetsual karah Martinelli-a'n thluak fim a hmang, a hmaa ball tla chu goal ruakah a khung, minute 67-naah Gunners lamin a vawi hnih nan Laipui an hmet puak.

Liverpool tlarhnung tana hnawk tak Havertz a venna lamah Ibrahima Konate chuan yellow card vawi hnihna a hmu a, hun la tawp chiah lo mah se goal phur leh kim lo zawk Klopp-a naute tan beisei a tlem ta.

Martinelli thlaktu substitute Leandro Trossard chuan angle zim tak aṭangin an goal thumna a khung, goal hnuhnung berah pawh Alisson chuan a dan theih tura ngaih a dang lo niin a lang, a tan zan chhinchhiah tlak a ni lo.

Arteta thluak

Arsenal manager Mikel Arteta-a'n goal keeper ball sem thei a duh a, a neihsa Aaron Ramsdale duh khawp loin Raya a la - Spanish goalkeeper hian mual sira awm Martinelli um turin ball a vawrh fo - Reds lakah pawh hetiang hian a ti.

Brazil international Martinelli khan a tlan chakna hmangin Liverpool defender a tibuai ṭhin a, a cross hlauhawm tak Saka-a'n a tauh luh loh kha lut ni ngat se la chuan a hmingṭha zual ang.

Havertz hmanga Van Dijk leh Konate te an chhaih buai ṭhin kha Kop hoin hmuh hrehawm an ti ang. Declan Rice leh Jorginho te ding dun khan ball an chang tam a, an sem chhuak hnemin Reds hlauhawmna lai tur tak an awpbet tlat.

Rice leh Jorginho te hmaah Odegaard a zalen a, Norway captain hi a tlan tamin ball a um char char a ni ber - thawhrimna hmangin Liverpool an hneh tiin a sawi theih, an tlarhnung tihsual zeuh erawh infuih thar an ngai.

Reds an chuai

BBC chief football writer Phil McNulty chuan, "An phu ang ngeiin Arsenal an chak" tiin a ziak. McNulty hi Liverpool, UK-a piang leh seilian Reds ṭantu a ni a, a thusawi hian Emirates Stadium chhunga inkhel boruak a tifiah hle.

Alisson chet fuh loh zan a ni a, goal an chhuahna pahnihah mawh a phur tiin a sawi theih, hei bakah hian a ball pek sual avangin goal hlauhawm tak a hmachhawn a ngaih phah bawk - a fimkhur lehzual a ngai.

Trent Alexander-Arnold-a'n hlauhawm taka ball pek chhuah a nei zauh zauh, chutihrualin a awmna sir lam a pawp ṭhin. Wing back hi goal nawrna hlauhawm leh hmunawm ni mah se, a letling zawng chiahin anmahni lama thil thlenna a ni ve bawk.

Liverpool an chak lo a, an chhe ta vek tihna erawh a ni lo. Arsenal aiin point hnihin an la sang zawk, an player ṭha Mohamed Salah an chhawr thei lo, forward Darwin Nunez chu bul ṭan ṭan turin a inpeih tawk lo bawk. Klopp hun hnuhnung lam a ni a, an hmuhnawm leh nghal ngei ang.