Messi khelh loh vangin Hong Kong mipui thinrim

Hong Kong khawpuiah Inter Miami chuan season thar inbuatsaihna an nei a, Lionel Messi inkhel en chaka mipui 40,000 chuang pungkhawmte chuan an duh an hmuh loh avangin an thinrim.

Inter Miami hian Hong Kong League khelh laia player ṭha zual XI te chu 4-1 in an hneh, mipuiin Messi inkhel lai an en chak - an duh an hmuh loh avangin inkhel enna tura ticket an leina chu pekkir an ngiat hial.

Hong Kong sorkar pawh a ngawi thei lo, an inremna ang chuan Messi hian a tlem berah minute 45 chhung tal khel tur a nih thu an sawi, hei vang hian Argentina captain inkhel lai en châkin mipui tam tak an pungkhawm.

Hong Kong sports minister Kevin Yeung chuan, "Insawifiahna kan phut a, Messi kha khelmual chhungah lo kalin lawmman hlan tuah tal ṭang se la, mahse kan hriat angin chutiang thil pawh chu a thleng ta si lo," a ti.

Messi bakah hian Luis Suarez pawh khup hliam vangin a inkhel lo. Inter Miami manager Gerardo Martino chuan Messi leh Suarez te inkhelh tir ngei duh mah se, medical staff lam thurawn anga chawl an nih thu a sawi ve thung.