South Korea hun a inher chhuak dawn em?

Zanin dar 8:30 hian Asian Cup 2023 semifinal hmasa zawkah Jordan leh South Korea te an inkhel dawn. Taegeuk Warriors hi Asia khawmualpuia football thiam ram tia sawi ni mah se 1960-a an ram ngeia an champion hnuah Asian Cup nomawi an chawi leh tawh lo.

South Korea hian German coach Jurgen Klinsmann hoin inelna an hmachhawn a, captain Son Heung-min an kawl bawk avangin nomawi chawi turin beiseina sang tak an nei.

Semifinal thleng turin South Korea hian team lian pahnih Saudi Arabia leh Australia te an hneh a, an chak danah an huaisenzia a lang. Saudi lakah goal chhuah hmasa mah se hun tawp thlengin an beidawng lo a, injury time-ah pawh minute kuanaah Cho Gue-sung hmanga si phurh sutin penalty shootout-ah an vannei zawk.

Quarterfinal-ah pawh South Korea hian Australia lakah goal an chhuah hmasa a, injury time minute ruknaah Hwang Hee-chan-a penalty hmangin si phurh an sut a; extra time-ah captain Son-a'n freekick aṭangin chakna goal a khung.

Group stage-ah pawh Jordan leh Malaysia nena an inkhelh ṭumin injury time-ah goal an khung ve ve a, an goal khung hi paih bosak ni ta se knockout stage an lut lo ang.

Semifinal-a an khingpui tur Jordan hi Klinsmann leh a hote tan zuam ngawt a rem lo. Group stage-ah team pahnih hi 2-2 in an inhnehtawk a, South Korea hi a suttu zawk an ni. Injury time-ah Jordan defender Yazan Al-Arab-a'n an lamah a tilut a, South Korea-in point khat hlu tak an hlawh chhuak.

Chutihrualin FIFA ranking aṭanga thlir chuan team pahnih an inthlau. South Korea hi 23-na an nih phak laiin Jordan erawh 87-na an ni thung. Asian Cup-ah pawh Jordan hian sulhnu ṭha chhuan tur an nei lo a, tun ṭuma semifinal an thlen hi, an thlen sang ber a ni.

Hussein Ammouta kaihhruai team hian semifinal-ah an zinkawng tihtawp an la tum lo a, South Korea hneha final thlen ngei an tum ang. Jordan hian semifinal thleng turin last 16-ah team ṭha Iraq an hneh a, quarterfinal-ah Tajikistan an hneh leh bawk a ni.