Man United ṭantute an nui leh thei ta

Manchester United-in khualmuala an hneh loh West Ham United lakah phuba an la a, Pathianni zan khan Old Trafford-ah Hammers hi 3-0 in an sawp. Erik Ten Hag-a hote tan Rasmus Hojlund-a'n goal ṭha bik a khung a, second half-ah rawlthar duhawm Alejandro Garnacho-a'n goal hnih a khung.

Premier League-ah Man United a zawnin an chak a, match 23 aṭanga point 28 hmuin paruknaah an awm a, season thara Champions League khelh an beisei leh thei ta bawk.

Hei le, Hojlund

Man United-in nipui bazarah goal khung thei bik striker Harry Kane en kanin kum naupang zawk leh hlawh tlem zawk Hojlund chu £72mtd-in an la lut. Krismas hmain Danish striker hian Premier League-ah goal a la khung lo a, Man United ṭantute an phun ṭan.

Mahse, Hojlund hian Champions League-ah goal khung thei striker a nihzia a lantir tawh a, football pundit tam takin ball ṭha a hmuh loh thu an tarlang nasa. Danish striker hian tun thlengin ball ṭha a la hmu tawk lo a, chutihrualin league match hnuhnung paliah goal li a khung.

December 26-a Aston Villa an hmachhawn ṭumin Hojlund hian goal a khung ṭan a, Nottingham Forest an hneh loh ṭumin inhliam vangin a khel lo. Tottenham nen an inkhelh ṭumin a rawn kir a, minute thumna lekah a pet goal nghal a, 2-2 in an inhnehtawk.

Kar laihawla Wolves 4-3 a an hneh ṭumin pawhin goal a khung a, striker goal tia sawi theih a ni. Hammers laka a goal khung hi a ṭha lehzual, Danish striker hian awm loa ta awmah a siam a ni ber a, a ball pet kawh ṭha zet chu West Ham keeper Alphonse Areola tan dan rual a ni lo.

Garnacho a rintlak

Man United-in mual sir aṭanga goal nawr theihna tur player an zawng a, hming langsar pahnih Jadon Sancho leh Antony te man to takin an la lut. Mahse, tun dinhmuna United goal nawrna ber chu club academy chhuak Alejandro Garnacho a ni daih.

Argentine winger Garnacho hian kum tinin hma a sawn a, kuminah goal nga a khung tling ta. Kum 19 mi Garnacho hian minute 49-naa goal khung tur hian vanneihna a mamawh tel a, a ball petin Hammers defender Nayef Aguerd a per zarah goal-ah a lut.

Kum 18 mi Kobbie Mainoo pawhin a thiamzia a lantir chhunzawm a, Garnacho goal khung zawhah goal lawm nan advertisment board-ah Garnacho, Mainoo leh Hojlund te an ṭhu a; United-in hmabak êng tak an nei tih a lang nghal.

Mainoo thlaktu Scott McTominay-a'n Garnacho goal hnihna khung tur a siamsak a, Man United-in David Moyes-a hote 3-0 in an hneh. Goal thum an khung bakah goal an chhuah loh hi Man United tan lawmna tham a tling.

Mahse maw...

Man United tan lawm a kim bik lo a, goal chhuah loh tur hian an vannei tel. Hammers tan hian Emerson-a'n chance ṭha bik ṭum hnih a nei a, awm ang lo takin a hlah ve ve. Chutihrualin keeper sawisel hlawh Andre Onana a che ṭha ve bawk.

Cameroonian keeper Onana hian Tomas Soucek-a goal khung tur a dansak chu ṭha tak a ni. Man United tlarhnung phui zel nan Onana chet ṭhat zel a pawimawh a, chutihrualin Lisandro Martinez inhliam chuan nghawng lian tak a nei thei bawk.

Martinez hian a theihna sanzia a lantir a, a inhliam leh si chuan United tan chânna lian tak a ni ang. Erik Ten Hag chuan, "A lan dan chuan a ṭha lo a, a dinhmun an zirchian hnuah a nihna tak erawh kan hre chauh ang," tiin a sawi. Argentine defender Martinez hi inhliam vangin tun season-ah match 22 a chawl tawh a ni.