Chelsea ngam loh Cunha leh Wolves

Matheus Cunha-a hattrick hmangin Wolverhampton Wanderers chuan Chelsea 4-2 in an hneh a, season hmang chhe tak Mauricio Pochettino-a leh a enkawl Blues an talbuai chhunzawm.

Pathianni zan Premier League inkhelah Wolves tan Cunha chuan goal thum a khung bakah Blues defender Axel Disasi-a'n anmahni lamah a ti lut. Chelsea forward Cole Palmer leh Thiago Silva te goal khungin London club mualpho tur a hliahkhuh zo lo.

Chelsea hian league match 11 aṭangin point 31 chauh an la hmu a, table-ah a chanve hnuai lamah an awm. An tan champion sawi phak a ni lo a, Champions League pawh a rim an hre phak lo - European football khelh phak hrim hrim pawh a harsa dawn.

Blues manager Pochettino chuan, "Zep miah loa sawi chuan kan ṭha lo a ni, a mawhphurtu hmasa ber chu keimah a ni. Wolves laka kan khelh dan te kha sawifiah harsa khawpa ṭha lo a ni," tiin an dinhmun a ṭha lo tih a pawm.

Poch hian nikum July thla khan Chelsea hi a enkawl ṭan - season hmasa khan Thomas Tuchel, Graham Potter leh Frank Lampard ten an enkawl hnuin London club hi a enkawl ṭan a, an beisei ang result a neihpui thei rih lo.

Premier League vawi nga champion tawh Chelsea manager Poch chuan, "Tun dinhmunah hi chuan a hmaa kan club nihna kha kan phak lo, hei hi kan pawm a ngai - beidawng thei erawh kan ni lo tih a chiang bawk.

"Kan zavaiin mawh kan phur a, keimah chauh ni loin player-te pawhin an mawhphurhna a ni ve bawk tih an hriat a ngai," a ti.

Season hmasa khan tun ang hunah hian Potter-a hoin Chelsea hian point 31 tho an hmu a, a hnu lawkah an manager an ban. Liverpool laka an mualpho hnuah Wolves an ngam lo zui a, manager ban thawm kan hria a nih pawhin a mak lo ang.