Aizawl FC mikhual tur Mohammedan an chak lo

I League hmahruaitu Mohammedan SC-in tun season-a a vawi khat nan hneh loh an tawng a, Pathianni zan khan Real Kashmir lakah 3-0 in an tlawm. Kashmir tan hian Shaher Shaheen-a'n hmahruaina goal a khung hnuah Gnohere Krizo-a'n goal hnih a khung belh.

Kolkata club hi chak zo lo mah se table-ah point 27 hmuin pakhatna an nih chhunzawm a, Sreenidi Deccan nena an inkar erawh point li chauh a ni tawh thung. Hyderabad club hian Churchill Brothers 2-1 in an hneh thung.

I League club-in thlasik chawlh an neih hnuin kartawp khan an khel leh ṭan a, Aizawl FC erawh kumina round hmasa berah an awl thung. Mizo club hian coach thar Stojkoski Bobi hnuaia an match hmasa ber chu February 10, Inrinni zan dar 7:00-ah Mohammedan SC nen RG Stadium, Mualpuiah an khel ang.

Aizawl FC hian January transfer-ah Iranian forward Amir Memari an la lut a, an player thar hian beisei a phak loh avangin thlasik bazar tawp niah Mizoram Santosh Trophy team-a mi Lalhriatpuia chu an la lut.

Farkawn tlangval Hriata hi MPL khelh zawh takah khan Electric Veng FC captain a ni a, goal sarih khungin top scorer Lalrinzuala chu goal khat chauhin a pha lo. Aizawl FC-ah Hriata leh Rinzuala te hian khelhna hmun an inchuh ang.