Juve hnehtu Inter Milan an sang

'Serie A Final' ang hiala an sawi inkhel pawimawhah Inter Milan chuan an mikhual Juventus 1-0 in an hneh a, an elpui ber an hneh avangin Italian champion ni turin an dinhmun a ṭha chho zel.

Pathianni zan Serie A inkhelah Inter Milan hian chak turin vanneihna an mamawh ve tho. Minute 37-naah defender Federico Gatti chuan anmahni lamah a tilut a, goal dang lut loin inkhel a tawp.

Inter hian match 22 aṭangin point 57 an hmu a, anmahni hnaih bertu Old Lady aiin match khatin an khel tlem zawk, khel tlem chung hian point li laiin an sang fal thei tho a ni.

Goal khat a tawk

Season kal laia Serie A team ṭha pahnih an ni a, tunlai an khelh dan thlirin dah san zawk tur neih thiam harsa mah se mualneitu Inter an hlauhawm zawk. Italian winger Federico Dimarco awmna lam aṭangin Inter Milan an hlauhawm.

Kum 26 mi Dimarco hian a sir aṭangin box chhungah ball hlauhawm a thawn lut hnem a, mahse an vanneih pui lo. Nicolo Barella tan a kanga a pek phei chu ball ṭha bik a ni, mahse keeper Wojciech Szczesny-a'n a lo dang hram.

Matteo Darmian, Marcus Thuram leh Marko Arnautovic ten hnai takah an hlah a, midfielder ṭha Hakan Calhanoglu chuan goal ban a pet per dawp bawk. A tir lama goal khat an neih bak an sual chhuak thei ta bik lo.

Juventus striker Dusan Vlahovic a hlauhawm tawk lo. Serbia international hian vawi khat chu hlauhawm deuh taka bin nei mah se goal zawnah a kal lo a, anmahni lama ti luttu Gatti-a'n box pawn aṭangin goal ban hrulah a pet chhuak bawk.

Inter hian tun season Serie A bikah hian minute 75 hnu lamah goal chhuah an la nei miah lo, a tawp lam boruak sangah an dingnghet ṭhin tihna a ni. Kum 2021 hnua a vawi khat nan champion an tum, an match lehpekah chuan AS Roma an tlawh ang.

Inelna la tawp lo

Khelmual chhungah theihtawpin an inbei a, khelmual pawn lamah rilru tibuai turin ṭawngkam an nei chho mek bawk. Simone Inzaghi-a'n inelna a la tawp loh thu a sawi laiin Massimiliano Allegri chuan Inter chu rinkai an nih thu a sawi.

Inter Milan manager Simone Inzaghi chuan, "Kan inbuatsaih leh tum dan angin kan khel thei a, player zawng zawng an khel ṭhain min ṭantute pawhin a tir aṭanga a tawp thlengin min thlawp ṭha hle.

"Tunah hian kan dinhmun a ṭha niin a lang, mahse Juventus leh AC Milan te hi an beidawng ve ngai lo, chuvangin kan inthlahdah thiang lo, kan chetsual zeuh chuan min rawn umphak nghal mai ang," a ti.

Juve manager Max Allegri chuan, "Inkhel harsa a ni dawn tih kha kan hre lawk a, a tir lam hun chanve kha chu kan inkhel tawk hleah ka ngai. Vannei takin goal an nei a, keini lamin kan remchang neih kan hlah thung.

"Nikum June thla kha thlirkir ila, tuna kan dinhmun ang hi kan ngaihtuah phak lo ang. Mahse, tunah chuan dinhmun duhawm takah kan ding, amaherawhchu tunah chuan Inter hi rinkai ber an ni," a ti.