Zaninah Copa del Rey semifinal

Copa del Rey semifinal hmasa zawk chu zanin hian khelh a ni dawn a, zan dar 1:30-ah Real Mallorca chuan Real Sociedad an mikhual ang. February 8, Ningani zing dar 2:00-ah semifinal pahnihna khelh tur niin, Atletico Madrid leh Athletic Bilbao an intawng ang.

Copa del Rey semifinal hi double leg-a khelh tur a ni a, home & away-a khelh tur niin, hetihrual hian away goal rule erawh hman a ni dawn lo.

Mallorca hian kum 2003 khan Copa del Rey nomawi an lo chawi tawh a, hemi hnu hian final pawh an khel leh tawh lo - hemi ṭuma an champion hi nomawi lian tham an chawi hnuhnun ber a ni nghal a, tun hi an tan nomawi chawi tura an kalkawng a fuh leh ber ṭum a ni hial ang.

Chumi tur chuan tlarhmaah Cyle Larin a chet ṭhat a ṭul a, Canadian forward hian tun season Copa del Rey match li a khelhah goal li khungin, assist vawi khat a nei tawh - Sociedad tan ven bik a sual lo ang. Copa del Rey-a goal ruk khunga top scorer ni mek Abdón Prats pawh hi lam hmaih a thiang lo a, tun season inelna hrang hrangah match 25 khela goal 11 khungin, assist vawi hnih a nei tawh.

Real Sociedad hian La Liga lama an intawn ṭumin Mallorca hi 1-0 in an lo hneh tawh a, Copa del Rey lamah hneh nawn an tum dawn - chumi tur chuan tun season-a goal 12 khung tawh Mikel Oyarzabal chet ṭhat leh a pawimawh dawn a, forward Ander Barrenetxea tan pawh tun hi 'vul' hun a ni.