Egypt-in coach an ban

Africa Cup of Nations 2023 khelh laia beisei an phak loh hnuah Egypt chuan an coach Rui Vitoria an ban. Egyptian Football Association (EFA) chuan Portuguese Coach nena an inṭhen thu hi an puang.

Egypt leh Vitoria ten inremna an neih lai hi 2026 World Cup thleng daih a ni. Mahse, Afcon-ah Egypt hian beisei an phak lo, vannei taka group stage an paltlang hnuah Congo hneh loin last 16-ah an zinkawng a tawp.

EFA chuan thuchhuah siamin, "Kan thawhhona chu kan titawp, kan tan a hnathawhte avangin lawmthu kan sawi," an ti a, an ram team enkawl ṭha thei tur coach an zawn thu an sawi lang tel bawk.

Vitoria hma hian Afcon kaihhnawihah Coach ban an awm nual. Algeria coach Djamel Belmadi, Gambia coach Tom Saintfiet, Ghana coach Chris Hughton, Tunisia coach Jalel Kadri, Tanzania coach Adel Amrouche leh Ivory Coast boss Jean-Louis Gasset te chuan an hna an lo chân tawh.