Madrid derby-ah chak zawk an awm lo

Girona-in hnehna an chan zawh loh hnuah Real Madrid-in point lia fala La Liga hmahruaitu nihna chance nei mah se, an hun ṭha neih an chhawr thei lo a, Madrid derby-ah Atletico Madrid nen 1-1 a inhnehtawkin an chak zo bik lo.

Inrinni zan khan Girona-in Real Sociedad chu 0-0 in an inhnehtawkpui a, Real tan result duhawm a ni. Mahse, Carlo Ancelotti naute hian an mikhual Atletico Madrid lakah hnehna an chang zo lo a, point hnih chauhin hmahruaitu an nihna chu an pawt fan thei.

Real tan season duhawm tak hmangtu Brahim Diaz chuan minute 20-naah goal hmahruai a khung a, Santiago Bernabeu-ah he goal hi an chakpui mai dawn niin a lang hman. Mahse, Atletico Madrid-in kut ruaka haw an lo duh lo.

Hun pek belh minute thumnaah Marcos Llorente chuan si phurh sutna goal a khung a, 1-1 a inhnehtawkin, inkhel a tawp - Atletico-in table-ah palina dinhmun an luah a, point 10 ngawta hmahruaitu Real an thlauh tak avangin champion beisei ngam a harsa ang.

Beisei loh Diaz

Ancelotti-a'n a tirah Diaz chu bul ṭan tur zingah a telh lo a, mahse, warm up-na lamah Vinícius Júnior a inhliam avangin Diaz hi luhtir a ni - Spanish forward hian chance pek a nih chhunah ṭha takin a chhawr a, minute 20-naah goal hmahruai a khung.

Diaz-a goal khung danah Koke chu dem theih a ni. Atletico captain hian Lucas Vazquez-a ball pet chu a dang per hret a, a per lehlam changtu Diaz hian Atletico defender ven karah ṭha taka la lutin, goal-ah a chantir.

Kum 24 mi forward hian footwork mawi zet pholangin, amahin chance a insiam zui a, mahse, goal hnih khung theihna remchang a neih erawh a chhawr ta lo - a thlirlet ang a, a ui vawng vawng ang.

AC Milan-a season thum zet loan-a khelhtir a nih hnua tun season ṭan dawna Real-in an kohkir Diaz hian season duhawm tak a hmang mek a, tun season inelna hrang hrangah match 26 khelin goal ruk a khung a, assist vawi thum a nei tawh bawk.

A tawpah Atletico

Rei tak chhung 1-0 in Atletico an hnufual a, goal hmaah an vannei tawk lo. Tun hnaia Kepa Arrizabalaga aia thlan hlawh Real Madrid keeper Andriy Lunin a che ṭha a, Axel Witsel-a ball tauh ṭha zeta a dansak bakah, Antoine Griezmann khung tur nia lang a dan pawh a ṭha hle.

Mahse, Real hi an ṭang tluan thei ta bik chuang lo a, Llorente chuan hun pek belh minute thumnaah si phurh sutna goal a khung - Memphis Depay-a ball tauh chu lo tauh ve lehin, Lunin tan dan rual a ni tawh lo.

Real leh Atletico hi Pathianni zana an intawn hmain tun season-ah vawi thum an lo intawng tawh. La Liga-a an intawn hmasak zawkah 3-1 in Atletico an chak a, Spanish Super Cup semifinal-ah 5-3 in Real an chak ve thung.

Copa del Rey round of 16-ah team pahnih an intawng leh a, 4-2 in Atletico Madrid an chak ve leh thung. Pathianni zanah chak zawk awm loin an inṭhen leh a, Real tan tun season-ah zet chuan Atletico hi an 'hmelma' an ni lehzual - hneh an harsat tlat!