Mumbai hnehtu Khalid-a Jamshedpur!

Khalid Jamil an neih hnuah Jamshedpur FC an kal dik zel a, Pathianni zan khan 2-0 ngawta an hnufual hnuah Mumbai City lakah 'comeback' ropui lantirin, 3-2 in hnehna an chang!

Mumbai Football Arena-a inkhelah Mumbai tan defender Hmingthanmawia (Valpuia), midfielder Lalengmawia Ralte (Apuia) leh forward Lallianzuala Chhangte ten inkhel bul an ṭan vek a, an khel pawh a nung ṭha hle.

Mualneitu team hian minute 14-na lekah Tiri hmangin goal hmahruai an khung a, minute 32-naah Lianzuala siamsak chu Alberto Noguera chuan an goal hnihna ni turin a khung bawk - Lianzuala che vel a hmuhnawm a, Mizo forward hi a vanneih zan ni se goal khung thei a ni.

Mumbai hi awlsam taka hnehna chang tura ngaihna a lian hman a, mahse, chawlhlawk hman a nih hnuah rilru thar nen Jamshedpur an inlar - Men of Steel hian Imran Khan hmangin minute 55-naah si phurh an sut ṭhen a, Jérémy Manzorro chuan minute li hnuah a sut zo der!

Jamshedpur an khel ṭha chhunzawm a, chawlh mai an tum lo. Minute 87-naah Daniel Chima Chukwu chuan penalty a hlawh chhuak zui a, Manzorro bawk hian goal-ah a chantir - hun tawp thlengin goal dang a lut tawh lo a, 3-2 in Jamshedpur an chak.

Men of Steel tan Mizo inkhel bul ṭan an awm lo a, PC Laldinpuia chu second half ṭantirah luhtir a ni - JFC an chak a, tun season-a vawi thum an chakna niin, Khalid-a hnuaia league match hnih an khelhah point li an nei ta.