Man City chakpuitu Phil Foden

Erling Haaland leh Kevin de Bruyne te inkhel bul ṭan rualin titi a titam a, hremna hmang zo tawh Ivan Toney chu ngaihven hlawh a ni bawk - Neal Maupay goal kan hmuh bawk avangin midang tan boruak siam a harsa a ni mai thei.

Mahse, inkhel boruak sang ngam zet mai chu Manchester City tan a rawn ding chhuak, a hming chu 'Phil Foden' a ni. England international hian hattrick siamin Citizens chu Brentford lakah 3-1 in a chakpui a, point thum an hlawh chhuak.

Pep Guardiola naute hian Premier League match 22 aṭangin point 49 an hmu a, pathumna Arsenal nen an inzat - khelh hmabak pakhat an la neihah an chak a nih chuan, match khelh zat inangah Liverpool an tlanpel thei dawn a ni.

A goal hmasa

Kyle Walker leh Ruben Dias te tlarhnungah an lo kir leh tawh a, midfielder Bernardo Silva a awm bawk. Mualneitu Brentford lamin Maupay hmangin goal an nei hmasa tlat si, defender Nathan Ake-a'n Toney a ven karah Maupay hi rawn dawk chhuakin goal ṭha tak a khung.

Man City an vannei mai lo - Brentford keeper Mark Flekken a che ṭha hle, goal luh hma hian tun hnaia khel ṭha tak Julian Alvarez leh Walker ten hla deuh tak aṭanga an shot chu ṭha takin a lo dang hram hram a, defender Josko Gvardiol khung tur pawh a lo dansak bawk.

Goal an chhuah hlimah Haaland pawhin sut theihna remchang a nei, Norway international striker hian a ball hmuh ṭha tak chu khung a inring hlein a rinawm bawk, mahse keeper Flekken chauh a hmachhawn hnuah a khung lo, a lo dansak leh tlat.

Chawlhlawk hma hretin Foden kan hmu. De Bruyne-a ball pet chu lo tauh chhuahsak mah se, ball per hi Foden chuan a awmin a la thla a, leia a sawt per chu laklawh nei miah loin a khung a, 1-1 in chawlhlawk an hmang.

Foden a inlar

Man City hi chetsual ve khut ching an ni a, season dangah pawh Brentford lakah hian an lo chesual tawh. Mahse, tun ṭum hi Foden an nei tlat a, an buaina chu hattrick hmangin a chingfel, nomawi humhim turin kawng dik an zawh theih phah.

De Bruyne-a ball pek chu Foden hian an goal hnih nan a tauh lut, 5ft 7in a sang player hi a khelhpuite zingah chuan a hniam pawl ni mah se awmna tur hmun a thlang dik a, zuan hranpa pawh nagi loin a awmhmun aṭangin a tauh lut.

Striker Haaland-a'n goal la khung chiah lo mah se an goal thumnaah tha a thawh, a tha thawh dan erawh Foden ropuina tizualtu a ni thung. Ball kal lai chu lo dang ding keuhin, English player hian box chhungah a la lut a, chiai miah loin an goal thumna a khung.

Foden hian Manchester United lakah hattrick a lo siam tawh a, English football inelna sang berah hian Eden Hazard, Sadio Mane, Gareth Bale leh Steven Gerrard te nen hattrick an siam zat a inang der tawh, kum 23 mi chauh a la ni.

Pep a lawm

Manchester City manager Pep Guardiola chuan, "Man City ka zawm hnua Foden-a'n season a hman ṭhat ber ṭum niin ka hria a, a chevel hi a hmuhnawm takzet a ni," tiin a sawi.

Point thum an hlawhchhuah avangin Pep a lawm a, hmabak erawh a awlsam dawn lo. Tun season Premier League hi club pathum Liverpool, Man City leh Arsenal te inbeihna a ni dawn. Reds hi pakhatnaah awm rih mah se pathumnaa awm Gunners-in 3-1 in an hneh.

Man City leh Liverpool te hi March 10, Pathianniah an la inkhel dawn a, Arsenal leh Man City hi March 31, Pathianni-ah an la inkhel dawn. A tawi zawngin Premier League final tia chhal theih match hnih chu a la awm dawn ngei e.

Man City hian Inrinni zan hian Etihad Stadium-ah Everton an mikhual dawn, an chak a nih chuan table chung berah an lawn kai leh dawn - season chawhnu lam, team ṭha fiahna hunah Guardiola leh a nauten an zia an chhuah leh mek.