Aston Villa mualah Chelsea lut dawn; Pochettino dinhmun a derthawng?

Tunlai chu Chelsea khingpui team ṭantute lamin auhla inang an nei ṭhin, chu chu Blues manager ban a nih tur thu a ni. Aston Villa ṭantute pawhin Mauricio Pochettino an au el leh a nih pawhin a mak lo ang.

Zanin dar 1:30 hian Poch-a enkawl Chelsea hian FA Cup fourth round replay khel turin Aston Villa an tlawh dawn, an intawn hmasakah goal awm lo 0-0 in an inhnehtawk, tun ṭumah chuan pakhat zawk an tlak ngei a ngai tawh dawn - inhnehtawk a awm thei tawh dawn lo.

Chelsea buaina

Eng lai ber hi nge siamṭhat ngai? tiin zawhna siam ta ila, chhanna a inang lo hlawm hle ang - tun dinhmunah chuan Chelsea hian insiamṭhat an ngai a, mimal bik pawh awm loin a club pumpui hian harh thar an mamawh a ni ber mai.

An buaina hmasa chu goal khung an harsat hi a ni. Rinrawl tura an tih Christopher Nkunku a inhliam rei a, tun hnaiah lo kir tawh mah se mamawh chhanna a la ni chiah lo, inkhel thunun tak chung sia goal an khung thei lo buaina kha chinfel a la ni lo.

Manchester City aṭanga an lak Cole Palmer hi a rintlak, a huaisenin goal hmaah a hriam bawk - ani hi striker ni chiah lo mah se tunah chuan 'Chelsea goal thun khawl' neih chhun tia sawi theih a ni, English player hi Villa lakah pawh rinrawl a ni leh ang.

Tawnhriat nei ṭha Raheem Sterling an nei a, beiseina sang tak nen sum tam tak senga an lei Mykhailo Mudryk an nei bawk - anni pahnih hian London club an zawm chhan tihlawhtling tura an beih a ngai, zanin hi an theihna an lantir hun tur chu a ni.

Goal khung harsatna chauh a ni lo, match hnuhnunga Wolves an tum ṭumin an tlarhnung a pawp takzet. Thiago Silva-a'n player naupang zawkte la ho thei mah se an nghet lo a, a sir lama awm Ben Chilwell-a'n mawhphurhna a nei lian ve bawk.

Poch a nghet?

Premier League bikah chuan season hmasa nena khaikhinin, league match an khelh zatah tun season nen an point hmuh a inzat, a hnu rei vak loah Chelsea hian an manager an ban zui - season hmasa khan Thomas Tuchel, Graham Potter leh Frank Lampard ten an enkawl hman.

Kuminah erawh che ṭha lo mah se Mauricio Pochettino an la ban lo. Tun hma lama Blues chet tawh ṭhin dan thlir chuan Poch hi ban mah se a mak lo ang, tun thlenga an la ban lo hian chhan lian tak a nei ngei ang tih a chiang, club thuenitu lam an dawhthei rih tlat.

Argentine manager hi ban ta se la Chelsea buaina hi a fel ang em, tih chu zawhna a ni a, tu nge a thlaktu atan an lak ang tih chu chhan harsa tak a ni ve bawk. Blues striker hlui Chris Sutton chuan an manager chungah dawhtheihna neih a ngaih thu a sawi.

Nipui bazar hmasa khan Chelsea hian pound maktaduai 380 an hmang - European club zinga hmang tam ber an ni. Todd Boehly-a'n thuneihna a neih chinah, player lei leh an neihsa thlun ngheh nan pound tluklehdingawn khat chuang an hmang tawh, an dinhmun chu tuna mi hi a ni.

A pawimawh hmasa chu Chelsea hian Aston Villa hnehin FA Cup fifth round lut se, inelna dang League Cup-ah final an lut tawh bawk. Season an hman chhiat ṭum pawh hian nomawi pahnih chawi thei dinhmunah an la ding, an boruak hi a la inthlak danglam hlawk thei tlat.

Emery-a Villa

Unai Emery hi attacking football ngainatu a ni a, "Si khat faia chak ai chuan 5-4 a chak ka duh," titu kha a ni. Goal khung tura nawr hi a nuam tih ber a ni a, a naute a khelhtir ṭhin dan a ni bawk - zaninah pawh an nawr leh chiam ngei ang.

Villa hian an match hnuhnung berah Sheffield United chu 5-0 in an sawp. Emery-a naute hian goal khung an harsat lo, chutihrualin an sawp team hi Premier League season kal laia goal chhuah hnem fal ber an ni a, ngaihdan chintawk hriat a ngai ve bawk.

Ollie Watkins an nei a, ani hi innghahna tlak a ni. England international hian season duhawm a hmang mek.EPL hmatawng zingah tun dinhmunah chuan ani aia thlan tur dang hi an tam bik lo - Blues tlarhnung tana buaina thlen thei tur a ni.

An buai theihna chu an tlarhnung lam a ni thung. Sheffield United lakah hian defender pawimawh Ezri Konsa chu hliam vanga lakchhuah a ni, zaninah a inlan theih a rinawm loh a, a hmun ruakah Matty Cash kan hmuh leh a rinawm.

Villa hian kar tawpah league match khel turin Manchester United an mikhual zui dawn - Spanish manager Emery tan thluak hman a ngai hle ang. FA Cup hi champion theihna hnai a ni a, league aṭangin Champions League khelh an tum ngam mek bawk.