Kar riat chawl tur Martinez

Manchester United defender Lisandro Martinez chu Pathianni zana West Ham United an hneh ṭuma a inhliam avangin kar riat chhung a chawlh a ṭul dawn.

Kum 26 mi Martinez hi Hammers defender Vladimir Coufal nen ball an inchuhna lamah a khupah hliam a tuar a, hliam a tawrh hnu hian rei lote khel zui leh mah se a hliam hi a nat avangin lak chhuah a ni ta tho.

Manchester United chuan, "Lisandro Martinez inhliam chhung hi a rei lo berah kar riat chhung ni tura ngaih a ni a, chutihrualin zai erawh a ṭul dawn lo. Licha hi dam vat turin kan beisei a, khelmuala kan hmuh leh thuai kan beisei," tiin thuchhuah an siam.

Argentine defender Martinez hi hliam vangin tun season-ah a la inlan mumal lo a, ke phah hliam vanga thla thum chuang a chawlh hnuah a rawn let leh chauh a, khup hliam vangin a chawlh leh a ṭul. Ke hliam vang hian match 22-ah a inlan thei lo a, January 14-a Tottenham an hmachhawn kha a khelh lehna hmasa ber a ni.

Manchester United hian Aston Villa, Luton, Fulham, FA Cup 5th round, Manchester City, Everton, Sheffield United, Brentford leh Chelsea an hmachhawn chho dawn a, heng match-te hi khel thei lo tura ngaih a ni. A dam chak a nih chuan April 6, Inrinni zana Liverpool an mikhual hunah a inlan thei ang.