AFCON semifinal zaninah ṭan dawn

African football-a ram leh ram inelna sang ber Africa Cup of Nations (AFCON) pawh a hmawr bawk a hnai ta a, zanin dar 10:30 hian semifinal hmasa zawk khelh a ni dawn - champion tum ruh Nigeria leh South Africa an intawng ang.

Team pahnih player neih dan en chuan Nigeria hi tlang mai tura beisei an ni a, chutihrual chuan South Africa hi champion beisei ngam Morocco meuh 2-0 a hneh thei an nih avangin Nigeria tan zuam sual theih an ni - fimkhur a finthlak dawn.

Zan dar 1:30-ah inelna thlengtu Ivory Coast leh DR Congo an inkhel dawn a, Ivory Coast hi Didier Drogba te hun lai ang emin langsar tawh lo mah se an semifinal zinkawnga an paltlangte enin chak tur rin kai zawk an ni.

Chutihrual chuan DR Congo player zingah European football khel an awm nual a, Mohamed Salah tel lohna Egypt pet chhuaktu an nih bawk avangin an inringtawk dawn - semifinal hmuhnawm beisei a sual lo ang.

Osimhen telna

Napoli forward ngaihven hlawh Victor Osimhen telna an nih avangin Nigeria-in ngaihven an hlawh a, mahse, tun inelnaa Super Eagles tana langsar zawk erawh Atalanta winger Ademola Lookman a ni - Osimhen-a'n goal khat chiah a la khung laiin goal thum a khung tawh.

Nigeria hian an match hmasa berah Equatorial Guinea (1-1) inhnehtawkpuiin bul ṭan mah se, Ivory Coast (1-0) leh Guinea-Bissau (1-0) hneh zuiin last 16 an lut a, champion beisei ngam Cameroon (2-0) lakah Lookman goal hnih hmanga chak zuiin, quarterfinal-ah 1-0 in Angola an hneh bawk a, he inkhela chakna goal khungtu pawh season hmasa lawka Atalanta Player of the Season Lookman tho a ni - he team hian semifinal-a Bafana Bafana hmachhawn hi an huphurh lo ang.

South Africa hian semifinal lut turin vanneihna an mamawh a, quarterfinal-ah team langsar pawh ni lo Cape Verde chu penalty hmangin an paltlang hram - captain leh keeper Ronwen Williams chuan penalty vawi li ngawt dangin a team a chhanhim a, final lut tur chuan kum 32 mi keeper hi a chet ṭhat leh a ṭul dawn. Ram tana a khelhpui Grant Kekana chuan, "South Africa economy tluchhe mek chhanhim turin Ronwen hi Finance Minister ni rawh se," tiin fiamthu a thawhzui a, he team tana an keeper pawimawhzia a hrilhfiah.

Bafana Bafana hian an match hmasa berah Mali chu 2-0 a ngam loin bul ṭan mah se, match hnihnaah Namibia chu 4-0 in an sawp a, Tunisia (0-0) inhnehtawkpui zuiin last 16 an lut. Round of 16-ah team ṭha Morocco chu 2-0 in an hneh a, mahse, quarterfinal-a Cape Verde pet chhuak tura penalty vanneihna an mamawh avangin Nigeria lakah an fimkhur a ṭul dawn.

A tawp khar ṭhat

Ivory Coast-in beisei angin bul an ṭan lo - an match hmasa berah Guinea-Bissau (2-0) hneh mah se, Nigeria (1-0) leh Equatorial Guinea (4-0) lakah a zawnin an mualpho zui a, pathumna tiṭha pali zinga tel chungin last 16 an lut hram.

Mahse, round of 16-ah champion lai Senegal chu penalty hmangin an pet chhuak a, quarterfinal-ah team ṭha Mali chu extra time-ah 2-1 in an hneh bawk - Ivory Coast an insiamṭha tih a lang a, mahni rama khel an nih bawk avangin DR Congo hi paltlang thei tura ngaih an ni.

Ivory Coast hi Turkish club Trabzonspor-a intuaithar mek Nicolas Pépé, Borussia Dortmund striker Sébastien Haller, AC Milan-a hming chher, Saudi club Al Ahli tana khel ta Franck Kessié leh Galatasaray defender Serge Aurier te neitu an ni a, boruak sangah chuan an rintlak viau ang.

Chutihrual chuan FIFA ranking-a 67-na DR Congo hi vanneih vang ngawta semifinal lut an ni bik lo. Tlarhmaah Brentford forward Yoane Wissa leh Real Betis forward thar Cedric Bakambu te dah thei an ni a, group stage-ah Zambia (1-1), Morocco (1-1) leh Tanzania (0-0) te draw vek mah se, last 16-ah champion beisei Egypt chu penalty hmanga pet chhuakin, quarterfinal-ah 3-1 in Guinea an hneh a, Ivory Coast lakah chak an tum dawn.

AFCON - Semifinal

February 6, Nilaini Zan

Nigeria 10:30 PM South Africa

Ivory Coast 01:30 AM DR Congo

*Inkhel hi fancode app leh website-ah en theih a ni.