Qatar hmaa ding tur Iran

Asian Cup 2023-ah inelna thlengtu Qatar-in semifinal an thleng a, Maroons hi champion lai ni bawk mah se an khingpui Iran hi final khel tura rinkai zawk an la ni tho. Semifinal hnuhnung zawk hi Al Thumama Stadium, Doha-ah zanin dar 8:30 hian khelh a ni ang.

Qatar chu

Qatar hi FIFA World Cup thlengtu an nih avangin an lar a, Asian Cup champion tia hriat lar an ni lo thung. Kum 2019 khan final-ah Japan 3-1 in an hneh a, a vawi khat nan an champion.

Maroons hian kuminah pawh champion rinkai ni thei tur khawpin an khel ṭha a, group match-ah Lebanon (3-0), Tajikistan (1-0) leh China (1-0) te an hneh vek a; goal khat mah an chhuah lo.

Last 16-ah Qatar hian Palestine lakah goal chhuah mah se 2-1 in an lehthal a, quarterfinal-ah Uzbekistan nen hun pangngaiah 1-1 a inhnehtawkin penalty shootout-ah an vannei zawk.

Qatar enkawltu Tintín Márquez hi Spanish a ni a, Espanyol pawh a lo enkawl tawh. Player-te erawh Qatar club tana khel vek an ni thung. Chutihrualin captain Hassan Al-Haydos (176), Abdulaziz Hatem (112) leh Boualem Khoukhi (110) te hi ram tana vawi 100 chuang khel tawh an ni a, an goal khung khawl Almoez hian ram tan match 96 aṭangin goal 50 a khung tawh.

Iran ve thung

Iran hi chu Asia ram ṭha ber zinga tel ve reng an ni a, World Cup hnuhnung pathumah pawh an tel vek. Asia Cup-ah pawh a zawn zatin vawi thum an champion tawh a, mah se an champion hnuhnun ber hi kum 1976 daih a ni.

Inelna hnuhnung berah khan Carlos Queiroz hoin semifinal an thleng a, Japan lakah 3-0 in an tlawm. Tun ṭumah hian Iranian coach Amir Ghalenoei hoin beiseina sang tak an nei a, Qatar aiin an squad pawh a chhah zawk.

AS Roma tana khel Sardar Azmoun, Porto tana khel Mehdi Taremi, Feyenoord tana khel Alireza Jahanbakhsh leh Brentford tana khel Saman Ghoddos te an ni nawk. Captain Ehsan Hajsafi hian ram tan match 137 zet a khel tawh a, AEK Athens tan a khel mek.

Tun ṭumah pawh hian inelna ṭha takin an hmang a; Palestine (4-1), Hong Kong (1-0) leh UAE (2-1) hneh vekin last 16 an lut. Knockout stage-ah erawh vanneihna an mamawh tel a, Syria lakah penalty shootout hmangin an chak hram. Quarterfinal-ah Japan lakah phuba an la a, chakna goal hi injury time-a an khung a ni.