AIFF-in 2024-25 season calendar a tichhuak

AIFF Competitions Calendar 2024-25 chu AIFF Executive Committee-in nimin khan an tichhuak a, Durand Cup hmangin inelna ṭan a ni dawn. Mizoram football tana thu lawmawm chu 78th National Football Championship for the Santosh Trophy khelh hun an tichiang hma hi a ni.

Nikum khan Santosh Trophy vangin Mizoram chhunga inelna sang ber Mizoram Premier League a buai phah a, inthlanpui a awm bawk avangin thla khat aia rei chawlh a ṭul hial. Kuminah pawh Santosh Trophy vangin MPL khelh hun a buai leh dawn a, MFA-in ruahmanna an siam ran a ṭul dawn.

Santosh Trophy group stage hi November 5-15, 2024 inkara khelh zawh tur a ni a, final round hi December 1-15, 2024 a khelh zawh tur a ni. I League khelh ṭan hun atan October 19, 2024 ruahman a ni a, Mizo club Aizawl FC an tel avangin MFA tan hei hi ngaihtuah tel a ṭul bawk.

MFA hian 2024-25 season hi a ṭan hma theih chuan Santosh Trophy ṭan hmain Mizoram Premier League hi khelh zawh theih a ni ang a, ruahmanna siam erawh a awlsma dawn lo. Zonet leh MFA ten MPL10 thleng inremna an nei a, contract thar ziah a nih loh avangin MPL hmalam hun pawh hriatthiam a la har hle.

MPL Board-in tun thlengin MPL qualifying round leh MPL Playoff a la buatsaih lo a, MPL10-a pasarihna Kolasib club Project Veng FC hmalam hun pawh a la chiang lo. AIFF-in season thar calendar an chhawpchhuah tawh avangin MFA lam hian tun season-a an khelh hmabakte an zawhfel a, season thar hmachhawp tur an ruahman fel a ṭul tawh takzet a ni.