Lingard-a'n FC Seoul a zawm

Manchester United midfielder hlui Jesse Lingard-a'n nimin khan South Korean club FC Seoul-ah medical test a paltlang a, kum hnih daih contract a ziak nghal. Vawiin aṭangin team training a zawm ang.

Kum 31 mi Jesse Lingard hi Manchester United academy chhuak a ni a; Europa League, FA Cup leh League Cup-ah te a champion tawh. English player zinga hmabak nei êng zinga mi ni mah se a ṭhat hun chhung a rei lo a, kum 2021 khan loan hmangin West Ham United-ah a kal a, match 16 lek aṭangin goal kua a khung. Hei hi Lingard-a vul lai ber tiin a sawi theih.

Lingard-a zawm tur FC Seoul hi K League 1 club an ni a, season liam ta khan team 12 zingah pasarihnaah an awm. Ṭum ruk lai K League 1-ah an champion tawh avangin FC Seoul hi Korean club vantlang chunglam tiin a sawi theih.

England tan vawi 32 inlana goal ruk khungtu Lingard hian season hmasa tawp rual khan Nottingham Forest a chhuahsan a, a club hlui West Ham leh Steven Gerrard enkawl Saudi Arabian club Al-Ettifaq-ah training mah se contract a ziak zui lo.

Lingard hian FC Seoul-ah hian kum khatah dollar maktaduai 1.15 a hlawh dawn nia sawi a ni a, K League-a hlawh hnem ber a ni ang - English midfielder hian khelmual chhung piah lamah Esports, fashion leh restaurant lama a sumdawnna chu South Korea-ah hian tihlen a duh niin an sawi.