Kalvin Phillips a rit mah mah

West Ham United chuan Manchester City aṭangin Kalvin Phillips chu loan hmangin an la lut a, England international midfielder hian match hnih khelh tawhah beisei a pha lo.

David Moyes-a'n Kalvin Phillips hi Bournemouth nen an inkhelh ṭumin bul a ṭantir nghal a, minute 68-naah la chhuakin inkhel hi 1-1 in a tawp. Manchester United nen an inkhelh ṭumin bench-ah ṭhuttir a ni a, goal hniha an hnufual hnuah Kalvin Phillips hi minute 72-naah luhtir chauh a ni.

Euro 2024 a hnaih tawh avangin English midfielder hian khelh tam duhin Hammers a zawm a; Edson Alvarez, Tomas Soucek leh James Ward-Prowse te an awm ve avangin beisei ang ngawt chuan khelh tam a awlsam dawn lo.

Khawthlang media-te chuan Kalvin Phillips hi a rit mah mah niin an sawi a, hei vang hian Hammers pawhin a thil ei tur bakah training dan tur a hranin an duang dawn niin an tarlang. Pep Guardiola pawhin nikum kum tawp khan Kalvin Phillips hi a 'overweight' thu a lo sawi tawh a, English midfielder hi a insiamṭhat ran loh chuan Man City ang thoin West Ham-ah pawh bench-a ṭhu thei dinhmunah a ding.