Rossi enkawl Roma an hrang chhunzawm
Daniele De Rossi-a'n a club hmangaih AS Roma tan hna ropui a thawk chhunzawm, match thum a kaihhruai tawhah hnehna an la chang fai vek. Thawhṭanni zan Serie A inkhelah Cagliari chu 4-0 in an sawp.
Roma hian season an hman ṭhat loh avangin manager Jose Mourinho an ban a, a aiawh turin player a nih laia an club jersey ha ṭhintu Rossi an ruai - an match hmasa pahnihah Hellas Verona leh Salernitana te 2-1 ve vein an hneh, tunah chuan goal an chhuah loh bakah an khung tam zual ta.
Goal li a lut
Stadio Olimpico hi Rome khawpuia khelmual hmingthang leh an ngaihhlut a ni a, tun hnaiah Roma ṭantute an phur thar avangin Cagliari tan pawh lenluh a châkawm loh ang, rin lawk ang ngeiin Rossi naute an che ṭha nghal bawk.
Minute hnihna lekah Lorenzo Pellegrini chuan corner aṭanga ball kal an tauh pial chu hnai tak aṭangin a khung nghal - table mawng lama talbuai lai Cagliari tan thawh chhuah leh chu huphurhawm tak a ni.
Mualneitu Roma lamin inkhel thunun chhunzawmin, chawlhlawk hmain Paulo Dybala chuan an goal hnihna a khung. Goal luh hmaa Roma player ten ball an inpe kual a hmuhnawm a, striker Romelu Lukaku-a'n a khawih duh loh luih hnuah Argentine striker hian a pet goal.
Second half-ah thawnthu a danglam lo, forward hmuhnawm Dybala-a'n penalty aṭanga an goal thumna a khung bakah substitute Dean Huijsen chuan an chak nemnghehna a tauh lut bawk a, nuamsa takin hnehna hlado an chham.
Roma an ṭha
Hnehna an chan hnuah Daniele De Rossi chuan, "Jose Mourinho enkawlna hnuaiah khan tun ṭuma kan match ang hian ṭha tak taka khelh chang an nei, chutiang hun chu keini pawhin kan tawng, ka naute hian a ṭha tawk a ni tih hi nghet taka an rin theih ka duh," a ti.
A zawnin vawi thum an chak a, chanchin ṭha bik a ni. Chutihrualin Roma hian fiahna tak tak an la hmachhawn loah a ngaih theih, an hneh team hi table hnuai lama mite an ni. Inrinni zan hian hmahruaitu Inter Milan an mikhual dawn, fiahna tak leh hautak a ni tawh ang.
Cagliari manager Claudio Ranieri chuan, "Roma khan keini aiin an ṭha zawk a ni tih a takin an lantir, kan dinhmun kha a inhnaih vak lo a ni. An team boruak a fuh a, kan lawmpui mai tur a ni, keini lamin insiamṭhat kan ngai tih kan pawm a ngai bawk," a ti.
Tun hnaiah Ranieri-a naute hi a zawnin vawi thum an tlawm ta, an hmabakah Lazio, Udinese leh Napoli te an tum dawn a, hna a hautak dawn hle. Tla thei china an awm mek avangin a rang thei ang bera insiamṭhat an mamawh.