Atletico tana nomawi beiseina Copa del Rey

Diego Simeone-a enkawl Atletico Madrid-in tun season-ah beisei an phak lo a, champion an beisei theihna chu Champions League leh Copa del Rey chiah a ni tawh, tiin a sawi theih.

Champions League-ah hian round of 16 an lut tawh a, mahse, he inelna hautakzia hretu tan champion sawi rik nan a la hma. A tawi zawnga sawi chuan Atletico tan Copa del Rey hi champion beisei sanna ber a ni.

Spanish Super Cup semifinal-ah Real Madrid an ngam lo a, La Liga-ah palina niin, hmahruaitu Real chu point 10-in an phak lo mek a, league match 23 khelh a nih tawh avangin Atletico tan champion turin thilmak a thlen a ngai tawh.

Champion an beiseina Copa del Rey-ah hian semifinal lut tawhin, Real Madrid leh Barcelona an tlak tawh avangin beisei a sang lehzual - naktuk zing lam dar 2:00 hian semifinal first leg khel turin Athletic Bilbao an mikhual dawn.

Atletico beiseina

Khawvela coach hlawh hnem ber Diego Simeone enkawl Atletico hian nomawi an chawi lohna a rei ve leh ta - kum 2021 khan La Liga nomawi chawiin, hemi hnu hian eng inelnaah mah an champion leh tawh lo a, Madrid khaw club ṭantuten Real leh Barca champion lawm lai en reng an ning tawh.

Copa del Rey bikah phei chuan kum 2013 hnu khan an la champion leh miah lo a, thawnthu thar ziah a hun tawh. Atletico hian Spanish Super Cup semifinal-a Real an ngam loh hnu khan inelna hrang hrangah match ruk khel tawhin, tlawm an la nei lo a, vawi nga chakin vawi khat draw an nei.

Super Cup-a an ngam loh Real ngei hi Copa del Rey round of 16 aṭangin an pet chhuak a, quarterfinal-ah Sevilla an hneh zui. Mahse, an league match hnuhnung berah Real an inhnehtawkpui hram a, point khat hlawhchhuak turin hun pek belha Marcos Llorente goal khung an mamawh.

A êng zawnga thlir erawh chuan minute 90 pelh thleng pawhin, beidawng loin an bei tihna a ni a, he team hian Athletic Bilbao lakah pawh chak ngei tumin an bei dawn - a hmuhnawm ang.

Atletico an ṭha

Atletico-in defender Cesar Azpilicueta, midfielder Thomas Lemar leh defender Jose Maria Gimenez te chu hliam vangin an la chhawr thei dawn lo a, mahse, Stefan Savic, Reinildo Mandava, Mario Hermoso leh Axel Witsel te neitu team tan lungphanna tur niin a lang lo.

Tlarhmaah Alvaro Morata leh Antoine Griezmann inkawp tluka hmuhnawm hi Spanish football-ah an awm rih lo. Kum 31 mi Morata hian tun season inelna hrang hrangah match 31 khelin goal 19 a khung der tawh a, assist vawi thum a nei tel bawk.

Barcelona-a beisei phak lo Griezmann-a'n Atletico a kir tirhah harsatna tawk deuh mah se a ṭhat dan berin a khel chhuak leh tawh a, tun season inelna hrang hrangah match 33 khela goal 18 khungin, assist vawi sarih zet a nei a, ven bik ngai a ni.

Atletico hian midfield-a khel turin Rodrigo De Paul leh Koke te ho an kawl bawk a, Madrid khaw club hi an squad a chhah ṭha hle - second leg-ah hlauthawnga khelh ngai loa zaninah chinfel vek mai an duh hial ang.

Mahse maw...

Kum 2021 khan Athletic Bilbao-in Spanish Super Cup nomawi an chawi a, an champion hnuhnun ber a ni. 1983-84 season khan La Liga leh Copa del Rey-ah an champion kawp a, hemi hnu hian inelna pahnihah hian an champion leh tawh lo - tun hi an tan hun ṭha a ni.

Mahse, Barcelona boss hlui Ernesto Valverde enkawl team hi Atletico tan dah hniam an thiang lo - league-ah pangana an ni mek a, palina Atletico an phak lohna hi point thum chiah a ni. An league match hnuhnung berah Real Mallorca chu 4-0 ngawtin an sawp bawk.

Hei mai hi a ni lo - Atletico-in semifinal an luhna kawnga Real an petchhuah an inchhuanpui a nih chuan, inchhuanna tur an nei ve tho. Quarterfinal-ah 4-2 in Xavi enkawl Barca an pet chhuak a, Valverde enkawl Bilbao hi an inrintawk lai tak a ni.

Atletico khelmuala chak hi Bilbao tan a pawimawh lehzual a, khualmualah an chak hmasa thei a nih ngat chuan an muala second leg khelh hunah chuan inrintawkna sang zawk nen Atletico an mikhual thei ang.

Bilbao hi

Atletico angin Bilbao-in player langsar an kawl hnem lo a ni mai thei a, mahse, an chhe lo - si ban nghaktu Unai Simón hi Spanish keeper ṭha tam tak kara Spain number 1 ni reng thei a ni a, Morata leh Griezmann tan hna a awlsam dawn lo.

Mallorca lakah forward Nico Williams chuan hliam a nei a, kum 21 mi Spain international hi a dinhmun a la chiang lo. A unaupa Iñaki Williams pawh Mallorca lakah hliam tenau nei mah se a dam chiang tawh a, Atletico a hmachhawn thei ang.

Bilbao tan Williams unau inlan theih hi a hlu a, tun hnaia hliam vanga chawl Inigo Lekue leh Alex Berenguer ten training an zawm leh tak avangin Bilbao phurna belhchhahin a awm dawn.

Kum 23 mi attacking midfielder Oihan Sancet hian tun season inelna hrang hrangah match 26 khela goal li khungin, assist vawi ruk a nei a, Spain international hi Atletico tana buaina thlen turin a ṭha tawk.