India an chak

India-in England laka First Test-a an tlawm hnuin Second Test-ah 106 runs-in hnehna an chang. Third Test hi February 15-19, 2024 inkar hian Saurashtra Cricket Association Stadium, Rajkot-ah khelh a ni ang.

ACA-VDCA Cricket Stadium, Visakhapatnam-ah ṭhumvawra chak India-in bat hmasak an thlang. Jashasvi Jaiswal-a'n double century (209) runs a siam a, thlawptu ṭha nei tawk lo mah se Shubman Gill (34), Rajat Patidar (32), Shreyas Iyer (27) leh Axar Patel (27) te zarah 396 runs an tlin.

England tan Zak Crawley-a'n 76 runs siam mah se first innings-ah 253 runs chauh an siam thei. India bat hun a thleng leh a, Jaiswal-a'n 17 runs chauh a siam tawh. Shubman Gill-a'n 104 runs a siam zarah second innings-ah 255 runs an siam a, target atan 399 runs an chhawp thei.

England opener Crawley-a'n 73 runs a siam a, Ben Duckett (28), Rehan Ahmed (23) leh Ollie Pope (23) te vangin India an hlauthawng hman. Mahse, Jasprit Bumrah leh Ravinchandran Ashwin ten wicket thum ve ve an la a, England-in 292 runs an siam tihin an thi fai vek.