LPS Cup-ah team 36 hming pe tawh

February 20, 2024 aṭanga khelh ṭan tur LPS Cup-ah team 36 chauhin hming an la pe a, entry fee hi February 10, Inrinni thlenga pek theih avangin team tel hi an la awm belh zel rin a ni. Entry fee hi Rs 2000 a ni a, Younix Sportswear, Zarkawt-ah a pek tur a ni.

Inelnaah hian Aizawl District chhung veng leh khua hrang hrang tan a tel theih. MFA-in ADFA a phalsak angin team pali Sialhawk, Keifang Jt VC, Thenzawl Jt VC leh Kawnpui Jt VC te an tel dawn. Inelna hi Aizawl DFA buatsaih tur a ni a, ADFA hian LPS Cup hma hian NECS Cup a buatsaih ṭhin.

NECS Cup hnuhnung ber finalist Armed Veng leh Republic Veng ten entry fee an pe tawh. ADFA buatsaih inelnaah hian Ramhlun South (2013, 2014, 2018), Armed Veng (2015, 2019), Bethlehem Vengthlang (2016) leh Chhinga Veng (2017) te an champion tawh a ni.