Asia Cup 2023 : South Korea-in Jordan an kân zo lo

Jordan-in an ram football history-a a vawi khat nan Asian Cup final an thleng. February 6, Thawhlehni zan khan Asian Cup semifinal zawk khelh a ni a, Jordan-in Asia powerhouse South Korea 2-0 in an hneh. Nizan khan semifinal hnuhnung zawkah Iran leh inelna thlengtu Qatar te an inkhel a, result kan hre hman lo.

Ahmad bin Ali Stadium, Al Rayyan-ah entu 42,850 an pung khawm a, inkhelh hmain South Korea captain Son Heung-min langsar ber mah se inkhelh zawhah Musa Al Taamari-a'n ngaihven zui a hlawh ber. Jordan tan Yazan Al Naimat leh Al Taamari ten goal an khung.

Jordan an nung

South Korea aiin Jordan-in bul an ṭan ṭha zawk a, goal khung tumin box pawn aṭangin risk an la nasa. Midfielder Nizar Al-Rashdan ball pet chu keeper Jo Hyeon-woo-a'n a dansak a, captain Ihsan Haddad ball pet pawh box pawnah chiah a kal.

Hun rei lote chhungin Jordan-in South Korea lakah hnehna an chang thei tih an lantir a, inkhelh hmaa team ṭha zawka ngaih Jurgen Klinsmann-a hoten beisei an pha lo. Jordan midfielder Noor Al-Rawabdeh-a ball pet pawh keeper Hyeon woo-a'n a dang ṭha hle.

Hei le, South Korea

South Korea an bet reng lo a, left back Seol Young-woo-a'n mual vei lama ball a chawh kual hnuah a cross ball chu Jordan defender-ten an clear ṭha tawk lo. Lee Kang in-a zawnah ball hi a tla a, mah se Kang in hian a pet over luah.

Captain Son-a'n box chhungah rilru fim takin ball a chang a, goal tum mai loin mualsira awm Hwang In-Beom a pe. South Korean midfielder In Beom-a cross chu Lee Jae-Sung-a'n goal ban a pet per.

First half-ah goal a lut lo a, goal chance nei ṭha zawk chu Jordan an ni. Al Naimat-a'n South Korean defender pathum a bum hnuah goal-ah ṭhat takin pet mah se keeper Hyeon woo-a'n a dang.

A goal ta

First half ang thoin second half-ah pawh Jordan-in bul an ṭan ṭha a, goal an khung ta bawk. South Korea defensive midfielder Park Yong woo-a'n hnung lamah ball a pe phei a, mah se defender lak hmain Jordan midfielder Al Taamari-a'n a la hman.

Montpellier tana khel mek Al Taamari hian ṭha taka a khalh luh hnuah box chhungah a ball ṭha a thawlh lut a, Jordan forward Al Naimat-a'n cool takin minute 53-naah a khung.

South Korea pawhin si phurh sutna chance nei ve nghal mah se Cho Gue-sung-a'n corner kick aṭanga a ball hmuh chu a tauh over. Jordan midfielder Al Tamari a hlauhawm chunzawm zel a, Al Naimat aṭanga a ball hmuh chu goal-ah ṭha takin pet mah se keeper Hyeon-woo-a'n a lo dang.

Minute 66-naah Al Tamari hian player talent ṭha bik a nihzia a pholang a, ama chance insiam chawpin ṭha takin goal lamah a khalh a, box pawn aṭangin goal ṭha bik a khung.

Tun inelnaa hun tawp lama goal khung thei tak South Korea hian ṭum dang an pha lo a, Jordan tlarhnung ṭhiah an harsat. Son leh Kang in ten Jordan tlarhnung ṭhiat mah se box chhungah Mohammad Abu Hashish-a'n sawisel boa ṭhain Kang in ball ken lai chu a tlawhsawn sak hman. Jordan-in an goal neih an veng him a, 2-0 in hnehna an chang.

Klinsmann a hlawhchham

South Korea hi Jurgen Klinsmann-a enkawl a ni a, Asian Cup nomawi chawi se, Taegeuk Warriors hi a hlawhtlinpui tiin a sawi theih. Chutihrualin South Korea hian semifinal hial thleng mah se an hneh loh hi Jordan a nih avangin German coach hi a hlawhchham tiin a sawi theih.

Taegeuk Warriors hian Premier League-a goal khung thei zinga mi Son Heung-min leh Hwang Hee chan te an kawl a, PSG forward nung ṭha Lee Kang in a nei bawk. Heti chunga goal zawna vawi khat pawh an pet lo hi mualphona a ni.

Inkhelh banah Klinsmann chuan, "Coach mawhphurhna a ni a, kan tum ram kan thlen loh chhanah hian mawh ka phur a ni. Chutihrualin kan result hi kan pawm thiam a ṭul a, Jordan khan chak an phu zawk," tiin a thiam loh a nih thu a sawi.

South Korea coach Klinsmann chuan sawi chhunzawmin, "Ban ka la tum lo. Tun tournament-a thil thleng hi kan zir chiang ang a, Korea-ah kirin football thuneitute nen a ṭha lai leh ṭha lo lai kan sawi ho ang. Thil ṭha lai tam tak a awm a, United States-a World Cup khelh tur atan kawng dik kan zawhin ka hria," tiin ban a la tum loh thu a sawi.