Aizawl FC leh Mohammedan inkhel en man Rs 100

Aizawl FC-in thlasik chawlh an hman hnuah kumin atana an I League match hmasa ber chu February 10, Inrinni zan dar 7:00 hian RG Stadium-ah Mohamnedan SC nen an inkhel dawn. Inkhel en man hi Rs 100 a ni a, ticket hi inkhelh niah a hmunah tlai dar 5:00 aṭanga zawrhchhuah ṭan a ni ang.

Kolkata club Mohammedan hian match 12 aṭanga point 27 hmuin I League-ah hmahruaitu an ni mek a, Aizawl FC hian match khata khel tlemin point 19 an hmu thung. Mizo coach B. Malsawmzuala hoin Mizo club hian result ṭha tak an nei a ni.

Aizawl FC hi Erol Akbay hoin season bul an ṭan a, mahse Dutch coach hi a ban avangin Sawmtea hian a enkawl chhunzawm. I League club enkawl tur hian AFC A Licence neih a ngai a, Sawmtea hian B Licence chauh a neih avangin dah nghet theih a ni lo. Hei vang hian team enkawl turin North Macedonia aṭangin Stojkoski Bobi an lalut.

Kum 58 mi Bobi ho hian Aizawl FC-in training ṭha tak an nei a, thlasik bazarah Polish midfielder Rafal Zaborowski leh Iranian forward Amir Memari te an lalut. Mahse, Amir hi team ti ṭha thei tur nia a lan loh avangin MPL10-a Electric Veng FC captain C. Lalhriatpuia chu transfer tawp niah an lalut leh bawk.

Aizawl FC hian thlasik bazarah squad an thuam ṭha hret a, an che ṭha zui ang em tih chu hunin a hril ang.