Mizoramin semifinal lut

India rama cricket thuneitu sang Board of Control for Cricket in India (BCCI) hnuaia inelna - Col CK Nayudu Trophy 2024 khelh laiah Mizoram Under 23 team chuan nimin khan Manipur hnehin plate group semifinal an lut.

Gujarat College Cricket Ground 'A'-ah Mizoram hian a ṭhenawm state Manipur hi 178 runs-in an hneh a, an match hmasa lamah Sikkim an hneh tawh bawk avangin an awmna group bikah hian a thiam zual pali zingah an tel.

Plate group aṭang hian Mizoram, Meghalaya, Arunachal Pradesh leh Nagaland an tlang - Sikkim leh Manipur ten semifinal an lut phak ve lo. February 11-14 chhungin Mizoram hian Polo Ground, Shillong-ah Meghalaya an tum leh ang.

Group match hnuhnung bera Manipur an hmachhawn ṭumah Mizoram hian vaw hmasain, an che fuh tawk lo. Sahil Reza chuan 61 runs siamin 1st innings a siam hnem ber a ni a, a tawp lamah Nasib Rai (20) leh Naveen Aayush Gurung (31) te an rawn khelh ṭha lehin 181 runs an tlin.

Manipur lamin bat ve lehin Sahil Sharma-a'n wicket li lain, Naveen Aayush Gurung chuan wicket thum a la bawk. Manipur player ten run 152 lek an siam tihah an vawm out ta vek.

Thawh hnihnaah (2nd innings) chuan boruak a danglam - Mizoram hian run 321 teh meuh an siam. Sahil Sharma-a'n run 133 vaw chhuakin Johan Lalbiakkima (61), Nasib Rai (39) leh Bernard Lalhmangaiha (25) te an thawhhlawk hle bawk.

Manipur tan target chu run 350 a tling. A vuak lamah hmasawn ve het mah se Johan Lalbiakima chuan wicket ruk ngawt a la a, ani bakah hian Rinsangzela'n wicket hnih lain ani bakah hian K. Vanrotlinga leh captain B. Lalnunfela ten wicket khat ve ve lain, 172 runs an siam tihin an vawm out vek.